खामगाव हादरले!:लग्नात डीजेवर नाचताना चुकून धक्का लागल्याच्या वादातून 23 वर्षीय तरुणाची निर्घृण हत्या
बुलढाणा जिल्ह्यातील खामगाव शहरातील बर्डे प्लॉट भागात एका लग्न समारंभादरम्यान क्षुल्लक वादातून 23 वर्षीय युवकाची निर्घृण हत्या झाल्याची धक्कादायक घटना घडली आहे. शोएब खान अमीन खान असे मृत युवकाचे नाव असून, तो बर्डे प्लॉट परिसरातील रहिवासी होता. स्थानिक स्मशानभूमीजवळ आयोजित एका लग्नात डीजेच्या तालावर युवक नाचत असताना, शोएबचा धक्का दुसऱ्या एका युवकाला लागला. या अत्यंत किरकोळ कारणावरून सुरू झालेल्या वादाने काही वेळातच हिंसक वळण घेतले आणि आनंदाच्या वातावरणाचे रूपांतर भीषण शोकांतिकेत झाले. या वादाचा राग मनात धरून चार ते पाच जणांच्या टोळक्याने संगनमत करून शोएबवर धारदार शस्त्रे आणि फायटरने जीवघेणा हल्ला केला. या भीषण हल्ल्यात गंभीर जखमी झालेला शोएब जागीच ठार झाला. भरवस्तीत झालेल्या या हत्येमुळे संपूर्ण बर्डे प्लॉट परिसरात दहशतीचे सावट पसरले असून नागरिकांमध्ये मोठी खळबळ उडाली आहे. घटनेची माहिती मिळताच खामगाव पोलिसांनी घटनास्थळी धाव घेत तपास सुरू केला असून, आरोपींचा शोध घेतला जात आहे. खामगाव येथील बर्डे प्लॉट भागातील स्मशानभूमीजवळ आयोजित एका लग्न समारंभात डीजेच्या तालावर नाचत असताना वादाची एक ठिणगी पडली. मिळालेल्या माहितीनुसार, शोएब खान अमीन खान (वय 23, रा. बर्डे प्लॉट) हा युवक तेथे नाचत असताना त्याचा धक्का दुसऱ्या एका तरुणाला लागला आणि याच किरकोळ कारणावरून झालेल्या वादातून ही धक्कादायक घटना घडली. नाचताना धक्का लागल्याच्या किरकोळ कारणावरून सुरू झालेल्या बाचाबाचीचे पर्यवसान एका भीषण हत्येत झाले. संतापलेल्या 4 ते 5 जणांच्या टोळक्याने संगनमत करून शोएब खान याच्यावर धारदार शस्त्रे आणि फायटरने जीवघेणा हल्ला चढवला. हा हल्ला इतका निर्घृण होता की, गंभीर दुखापत झाल्यामुळे शोएबचा जागीच मृत्यू झाला. एका आनंदाच्या प्रसंगी क्षुल्लक वादातून तरुण रक्ताचा असा शेवट झाल्याने परिसरात हळहळ व्यक्त केली जात आहे. घटनेची माहिती मिळताच खामगाव पोलिसांनी तातडीने घटनास्थळी धाव घेतली. या हत्येमुळे सध्या बर्डे प्लॉट परिसरात तणावाचे वातावरण असून, कोणताही अनुचित प्रकार टाळण्यासाठी पोलिसांनी खबरदारीचा उपाय म्हणून मोठा बंदोबस्त तैनात केला आहे. पोलीस सध्या या प्रकरणाचा सविस्तर तपास करत असून, फरार आरोपींच्या मुसक्या आवळण्यासाठी शोधमोहीम तीव्र करण्यात आली आहे.
