माढा बस स्थानकाचे आधुनिकीकरण रखडले:प्रवाशी वर्गातून तीव्र संताप, 50 वर्षांपूर्वी बांधलेल्या इमारतीची दुरवस्था, ”पीपीपी” मॉडेलच्या गप्पा हवेत‎

.

माढा हा कृषीप्रधान तालुका असून परिसरातील सुमारे ४० गावांतील नागरिक प्रवासासाठी याच स्थानकावर अवलंबून आहेत. दररोज येथे ४० ते ५० गाड्यांची वर्दळ असते. यामध्ये नाशिक, गुलबर्गा, गाणगापूर, पुणे, बोरिवली यांसारख्या लांब पल्ल्याच्या गाड्यांसह मध्यम पल्ल्याच्या गाड्यांचा समावेश आहे. व्यापारी, शेतकरी आणि मोठ्या संख्येने असणारा विद्यार्थी वर्ग या स्थानकाचा वापर करतो, मात्र वाढत्या प्रवासी संख्येच्या तुलनेत सुविधा ‘शून्य’ आहेत.

बस स्थानक परिसराचे काँक्रिटीकरण न झाल्याने पावसाळ्यात संपूर्ण आगार चिखलमय होते. प्रवाशांना चिखल तुडवतच बस गाठावी लागते. जून्या इमारतीमुळे छताला गळती लागली असून अपुरे फलाट, अपुरा प्रकाश, अस्वच्छ पाणी आणि दुर्गंधीयुक्त स्वच्छतागृहे यामुळे प्रवाशांचे आरोग्य धोक्यात आले आहे. सोलापूर आणि पंढरपूर बस स्थानकांचा विकास होत असताना माढ्याला मात्र नेहमीच सापत्न वागणूक दिली जात असल्याची भावना नागरिकांमधून व्यक्त होत आहे. ^माढा बस स्थानकाचे बीओटी तत्त्वावर बांधकाम करण्यासाठी एस टी महामंडळाकडून राज्य सरकारकडे प्रस्ताव दाखल करण्यात आला आहे. याकामी मुंबईच्या कंपनीकडे डिझाईन तयार करण्याचे काम दिले असून कंपनीने तयार केलेले डिझाईन राज्य सरकारकडे दाखल केले आहे. राज्य सरकारकडून मंजुरी प्राप्त होताच कामास सुरुवात होणार आहे. – आ. अभिजीत पाटील, आमदार ^सुमारे पन्नास वर्षांपूर्वीचे बस स्थानक असल्याने अनेक आधुनिक सुविधांची वानवा आहे. बस स्थानकाच्या आतील परिसरात डांबरीकरण नाही, शौचालयाची पुरेशी सुविधा नाही, सांडपाण्याचे योग्य नियोजन नसल्याने प्रवाशांना अनेक अडचणींना सामोरे जावे लागत आहे. त्यामुळे राज्यकर्त्यांनी लक्ष घालून माढा बस स्थानकाचे आधुनिकीकरण करणे गरजेचे आहे. – संतोष पंडित, अध्यक्ष, प्रवासी वेल्फेअर असोसिएशन . जुन्या इमारती: ५० वर्षांपूर्वीच्या बांधकामामुळे इमारत कमकुवत. . चिखलाचे साम्राज्य: काँक्रिटीकरण नसल्याने पावसाळ्यात प्रवाशांचे हाल. . अस्वच्छता: स्वच्छतागृहांची दुरवस्था आणि पिण्याच्या पाण्याची सोय नाही. . अंधाराचे साम्राज्य: स्थानक परिसरात पुरेशी प्रकाश व्यवस्था उपलब्ध नाही. ^माढा बस स्थानक दर्शनी भागात येणे गरजेचे असून काही सुविधा उपलब्ध असल्या तरी आधुनिकीकरण नसल्याने अनेक सुविधांचा अभाव आहे. आधुनिकीकरण झाल्यास प्रवाशांना सुविधा मिळण्याबरोबरच बस स्थानकाच्या जागेत व्यापारी गाळे उभारल्यास महामंडळाचे उत्पन्नही वाढणार आहे. – रत्नाकर लाड, आगार व्यवस्थापक, कुर्डूवाडी

स्थानिक राज्यकर्त्यांनी लक्ष देणे गरजेचे

राज्य सरकारच्या मंजुरीची प्रतीक्षा

प्रमुख समस्यांचा पाढा