पुण्यातून रवींद्र धंगेकरांचा गृह खात्यावर हल्लाबोल:मी 'सीएमचा माणूस' म्हणत लोकांना लुटणाऱ्या बनावट उद्योजकाला कोणाचा वरदहस्त? 8 दिवसांत कारवाई न झाल्यास ठिय्या आंदोलन

“मी थेट मुख्यमंत्री देवेंद्र फडणवीस यांचा माणूस आहे, अशी बतावणी करत पोलीस प्रशासनाच्या डोळ्यात धूळफेक करणाऱ्या आणि खंडणी, फसवणूक करत सर्वसामान्यांना वेठीस धरणाऱ्या एका बनावट उद्योजकाला गृह खात्यातील नेमक्या कोणत्या नेत्यांचे संरक्षण लाभले आहे? आठ दिवस उलटून गेले तरी त्याच्यावर गुन्हा दाखल का होत नाही? जर या प्रकरणाचा तातडीने सोक्षमोक्ष लावला नाही, तर मी स्वतः पोलीस महासंचालक कार्यालयाबाहेर बेमुदत ठिय्या आंदोलन करेन,” असा इशारा पुण्याचे शिवसेना (शिंदे गट) नेते तथा माजी आमदार रवींद्र धंगेकर यांनी दिला आहे. पुण्यात घेतलेल्या पत्रकार परिषदेत रवींद्र धंगेकर यांनी एका बनावट उद्योजकाचे गैरव्यवहार, 264 एकर जमिनीचा कथित गैरव्यवहार, विधानपरिषद निवडणुकीवरून सुरू असलेली भाजपची टीका, आणि भाजप प्रवक्ते नवनाथ बन यांनी केलेल्या वैयक्तिक टीकेवर सविस्तर भाष्य केले. सीएम साहेबांचे नाव घेणाऱ्या त्या तोतया उद्योजकाला तातडीने बेड्या ठोका कथित बनावट उद्योजकाच्या कारनाम्यांचा पाढा वाचताना रवींद्र धंगेकर म्हणाले, “स्वतःला मुख्यमंत्र्यांचा जवळचा माणूस सांगून हा व्यक्ती स्थानिक कुटुंबांना आणि कामगारांना धमकावतो, त्यांना त्रास देतो. पोलिसांच्या डोळ्यात धूळफेक करून त्याने ‘वाय’ दर्जाचे पोलीस संरक्षण मिळवले आहे. हा व्यक्ती ब्लॅकचे पैसे व्हाईट करणे, जमिनी हडप करणे आणि बोटींच्या माध्यमातून आंतरराष्ट्रीय स्तरावर गैरव्यवहार चालवत असल्याची माहिती समोर आली आहे.” 264 एकर जमिनीचा गैरव्यवहार “गोंड प्रोजेक्टच्या नावाखाली 264 एकर जमिनीचा मोठा घोटाळा रचला गेला असून नोंदणी विभाग, महसूल खाते आणि शासनाची फसवणूक करण्यात आली आहे. अशा नराधमाला आजच्या आज बेड्या घालून तुरुंगात धाडले पाहिजे. हा व्यक्ती जर उघडपणे मुख्यमंत्री देवेंद्र फडणवीस यांच्या नावाचा गैरवापर करत असेल, तर गृह खात्याने आणि स्वतः मुख्यमंत्र्यांनी यावर स्पष्टीकरण दिले पाहिजे. या संपूर्ण प्रकरणात देशाचे गृहमंत्री अमित शाह आणि पंतप्रधान नरेंद्र मोदी यांनी स्वतः लक्ष घालून तपास यंत्रणांना चौकशीचे आदेश द्यावेत.” पोलीस महासंचालक कार्यालयाबाहेर ठिय्या देण्याचा इशारा “गेल्या 8 दिवसांपासून वर्तमानपत्रांत याच्या बातम्या येत आहेत, तरीही स्थानिक पातळीवर कारवाई का होत नाही? जर पोलिसांनी यावर कठोर कारवाई केली नाही, तर मी पोलीस महासंचालक (DGP) कार्यालयासमोर ठिय्या आंदोलन करणार आहे.” मानवाचा जन्म माकडापासूनच झाला; नवनाथ बन यांनी आई-वडिलांना विचारावे भाजप प्रवक्ते नवनाथ बन यांनी ‘माकडछाप’ असा उल्लेख केल्याच्या विधानावर धंगेकरांनी प्रत्युत्तर दिले. “मी मानव आहे आणि मानवाचा जन्म माकडापासूनच झाला आहे, हे विज्ञानाने सिद्ध केले आहे. मला माकड म्हणणाऱ्या बन यांनी स्वतःच्या आई-वडिलांना विचारले पाहिजे की त्यांचा जन्म कोठून झाला. ते डायनासोरसारखे बोलत फिरत आहेत.” उमेदवारी आणि गुटखा किंगचे लागेबांधे “पुणे पदवीधर निवडणुकीत एका वृत्तपत्र समूहाच्या कुटुंबातील व्यक्तीला उमेदवारी देण्यात आली, ज्यांनी नेहमी जाहिरातींच्या नावाखाली कार्यकर्त्यांची लूट केली. पुणे महानगरपालिकेतील जाहिराती, टेंडर्स आणि गुटखा किंगसोबत असणारे लागेबांधे यावर भाजपने आधी खुलासा करावा.” भाजपचे चिंतन शिबिर पुण्यात ते नागपुरात का अपयशी ठरले याचे उत्तर देईल विधानपरिषद निकालांवरून भाजप नेत्यांकडून मित्रपक्षावर होत असलेल्या खापरफोडीवर त्यांनी मत व्यक्त केले. “पुण्यात बी. एल. संतोष यांच्या उपस्थितीत झालेल्या चिंतन शिबिराचे मी स्वागत करतो. या बैठकीत मित्रपक्षाने काम केले की नाही यापेक्षा भाजपच्या कार्यकर्त्यांनी आणि नेत्यांनी काम का केले नाही, याचे खरे आत्मचिंतन होईल.” मित्रपक्षांना डावलल्याचा फटका “पुण्यापासून नागपूरपर्यंत सहपक्षातील कार्यकर्त्यांना आणि मित्रपक्षाला ज्या पद्धतीने डावलले गेले, त्यामुळेच हा पराभव झाला आहे. दोन महिन्यांपूर्वी आमच्या पालकमंत्र्यांना पोलिसांनी गचांडी धरून आणले, तेव्हा भाजपला लाज वाटली नाही का? सत्तेत बसलेल्यांना प्रश्न विचारणे हा शिवसैनिक म्हणून आमचा अधिकार आहे आणि तो आम्ही बजावणारच,” असे धंगेकर यांनी शेवटी स्पष्ट केले. ———————————————– हेही वाचा… नाशिक-त्र्यंबकेश्वर सिंहस्थ कुंभमेळ्याला आजपासून सुरुवात: राष्ट्रपती मुर्मू ध्वजस्तंभ पूजन, ध्वजारोहण सोहळ्यात सहभागी होणार; 22 महिने चालणार नाशिकच्या रामकुंड आणि त्र्यंबकेश्वर येथे आजपासून सिंहस्थ महाकुंभ मेळ्याची औपचारिक सुरुवात होणार आहे. दुपारी 12:02 वाजता रामकुंड येथे ध्वजारोहण होईल, ज्यात राष्ट्रपती द्रौपदी मुर्मू सहभागी होतील. नाशिक आणि त्र्यंबकेश्वर या दोन धार्मिक शहरांमध्ये दर 12 वर्षांनी महाकुंभ भरतो. लाखो भाविक गोदावरी नदीत पवित्र स्नान करतात. नाशिकमध्ये रामकुंड आणि त्र्यंबकेश्वर येथे कुशावर्त तीर्थावर स्नान केले जाते. सविस्तर वाचा