Tensions rise, shutdown and protests

मणिपूरच्या सेनापती जिल्ह्यात रविवारी दोन तरुणांचे छिन्नविच्छिन्न मृतदेह आढळल्यानंतर कुकी व नागा समुदायांमध्ये तणाव वाढला आहे. हे मृतदेह २९ ऑक्टोबरपासून बेपत्ता कांगपोकपी जिल्ह्यातील ताफू कुकी गावातील थांग्गिन्लुन चोंग्लोई (२१) आणि पाओगिन्लाल हांग्सिंग (२०) यांचे असल्याचा संशय आहे. रिपोर्टरच्या माहितीनुसार, मृतदेह केळीच्या बागेत पोत्यांमध्ये लपवून ठेवण्यात आले होते. पोलिसांच्या माहितीनुसार, मृतदेहांची ओळख पटवण्याचे काम सुरू आहे. संयुक्त सुरक्षा दलांनी शोधमोहिमेदरम्यान दोन्ही मृतदेह जप्त केले.

या घटनेनंतर कांगपोकपीमध्ये लोक रस्त्यावर उतरले. आंदोलकांनी राष्ट्रीय महामार्ग-२ रोखून धरला. कांगपोकपी पूल परिसरात नागा समुदायाच्या दोन घरांना आग लावण्यात आल्याचे वृत्त आहे. कुकी-झो संघटना कमिटी ऑन ट्रायबल युनिटीच्या (कोटू) आवाहनावर जिल्ह्यात बंद पाळण्यात आला.

तणाव वाढल्याने पोलिसांनी मृतदेह जिल्हा रुग्णालयातून एसपी कार्यालयात हलवले. जोपर्यंत नागा समुदायातून आलेले उपमुख्यमंत्री लोसी दीखो यांना हटवण्याची व दोषींना अटक होत नाही तोपर्यंत मृतदेह स्वीकारणार नाही, अशी घोषणा ‘कोटू’ने केली. यापूर्वी मे महिन्यात ६ लियांगमेई नागा नागरिकांचे अपहरण झाले होते. जूनमध्ये त्यांचे मृतदेह आढळले होते.