आसाम मुख्यमंत्र्यांच्या वक्तव्याविरोधात युवक काँग्रेसचे आंदोलन:स्वारगेट येथे तीव्र निदर्शने, पुतळा दहन करण्याचा प्रयत्न
आसामचे मुख्यमंत्री हिमंता बिस्वा सरमा यांनी काँग्रेस अध्यक्ष मल्लिकार्जुन खर्गे यांच्याबद्दल केलेल्या कथित अपमानजनक वक्तव्याच्या निषेधार्थ मंगळवारी पुणे शहरातील स्वारगेट चौकात युवक काँग्रेसने तीव्र आंदोलन केले. महाराष्ट्र प्रदेश युवक काँग्रेस आणि पुणे शहर युवक काँग्रेसच्या वतीने हे आंदोलन आयोजित करण्यात आले होते. या आंदोलनात युवक काँग्रेसच्या कार्यकर्त्यांनी मोठ्या संख्येने सहभाग घेतला. कार्यकर्त्यांनी “संविधान बचाव” आणि “दलितांचा अपमान सहन करणार नाही” अशा घोषणा दिल्या. यावेळी हिमंता बिस्वा सरमा यांच्या वक्तव्याचा निषेध म्हणून प्रतीकात्मक ‘जोडे मारो’ आंदोलन करण्यात आले आणि त्यांच्या पुतळ्याचे दहन करण्याचा प्रयत्नही करण्यात आला. आंदोलनादरम्यान परिस्थिती तणावपूर्ण बनल्याने पोलीस प्रशासनाने तात्काळ हस्तक्षेप केला. पोलिसांनी प्रतिबंधात्मक कारवाई करत आंदोलनात सहभागी झालेल्या युवक काँग्रेसच्या अनेक पदाधिकाऱ्यांना आणि कार्यकर्त्यांना ताब्यात घेतले. युवक काँग्रेसने स्पष्ट केले की, हिमंता बिस्वा सरमा यांचे वक्तव्य केवळ एका व्यक्तीचा अपमान नसून, संपूर्ण दलित समाजाच्या स्वाभिमानावर केलेला थेट हल्ला आहे. हे भाजप आणि संघाच्या मनुवादी व प्रतिगामी विचारसरणीचे उदाहरण असून, अशा वक्तव्यांमुळे समाजात द्वेष आणि विषमता पसरवली जात असल्याचा आरोप त्यांनी केला. यावेळी अखिल भारतीय काँग्रेसचे प्रवक्ते पवन खेडा यांना बेकायदेशीरपणे राज्याबाहेर नेऊन अटक करण्याचा प्रयत्न हा लोकशाही मूल्यांवर गंभीर आघात असून, विरोधकांचा आवाज दडपण्याचा हा प्रकार असल्याचेही युवक काँग्रेसने नमूद केले. दलित समाजाचा अपमान आणि लोकशाहीविरोधी कृत्ये सहन केली जाणार नाहीत, असा इशारा देत अशा घटनांविरोधात आंदोलन अधिक तीव्र करण्यात येईल, असे युवक काँग्रेसने म्हटले आहे. पुणे शहर युवक काँग्रेसचे अध्यक्ष सौरभ अमराळे यांनी यावेळी बोलताना सांगितले की, देशातील सर्वात ज्येष्ठ दलित नेत्याबद्दल भाजपा मुख्यमंत्र्यांनी केलेली टिप्पणी ही भाजपची संस्कृती दर्शवते. मुख्य भ्रष्टाचाराच्या विषयाला बगल देऊन दुर्लक्षित करण्याचा हा प्रयत्न असल्याचा सवाल त्यांनी केला. या आंदोलनात महाराष्ट्र प्रदेश युवक काँग्रेसचे उपाध्यक्ष प्रथमेश अबनावे, पुणे शहर युवक काँग्रेसचे अध्यक्ष सौरभ अमराळे, प्रदेश महासचिव महेश म्हेत्रे, दिलीपसिंह देशमुख, भूषण रानभरे, प्रदेश सचिव निखिल मलके, विश्वजित जाधव, प्रदीप मेहकरे, अविनाश साळुंखे, अर्थव सोनार, पुणे शहर युवक काँग्रेसचे अभिजित चव्हाण, उपाध्यक्ष सद्दाम शेख, कुणाल काळे, पर्वती विधानसभा मतदारसंघ अध्यक्ष पुष्कर आबनावे, पुणे जिल्हा युवक काँग्रेस सचिव भूषण पाटोदकर यांच्यासह अनेक पदाधिकारी व कार्यकर्ते उपस्थित होते.
