IPL 2026 | संजू सॅमसनच्या खराब फॉर्मवर फ्लेमिंग यांचा मोठा खुलासा; नक्की कुठे चुकतोय संजू? वाचा सविस्तर
IPL 2026 | IPL हंगामाची सुरुवात CSK साठी निराशाजनक ठरली आहे. सलग तीन सामन्यांत पराभव पत्करावा लागल्यामुळे संघावर टीकेची झोड उठली आहे. या पराभवांमध्ये फलंदाजीतील अपयश हे प्रमुख कारण ठरत असून विशेषतः संजू सॅमसन (Sanju Samson) याच्या कामगिरीकडे सर्वांचे लक्ष लागले आहे.
स्पर्धेतील पहिल्या तीन सामन्यांत संजू सॅमसनला अपेक्षित धावा करता आलेल्या नाहीत. त्यामुळे चाहत्यांमध्ये नाराजी निर्माण झाली आहे. अशा परिस्थितीत संघाचे मुख्य प्रशिक्षक स्टीफन फ्लेमिंग यांनी त्याच्या सध्याच्या फॉर्मबाबत महत्त्वाचं स्पष्टीकरण दिलं आहे.
स्टीफन फ्लेमिंग यांच्या मते, एखादा खेळाडू दीर्घकाळ एका फ्रँचायझीसोबत खेळल्यानंतर अचानक नवीन संघात आल्यावर सुरुवातीला जुळवून घेण्यासाठी वेळ लागतो. संजू सॅमसन अनेक वर्षे राजस्थान रॉयल्स (Rajasthan Royals) संघासोबत खेळत होता. त्यामुळे नवीन वातावरण, नवीन खेळाडू आणि वेगळी रणनीती यांच्याशी जुळवून घेण्यासाठी काही काळ लागणे स्वाभाविक असल्याचं त्यांनी सांगितलं.
फ्लेमिंग यांनी सांगितलं की, सॅमसन संघात चांगल्या प्रकारे मिसळण्याचा प्रयत्न करत आहे. मात्र अजूनही तो पूर्णपणे त्या वातावरणाशी जुळवून घेण्याच्या प्रक्रियेत आहे. त्याच्याकडे उत्तम क्षमता असून योग्य वेळ मिळाल्यास तो पुन्हा मोठ्या धावा करेल, असा विश्वास त्यांनी व्यक्त केला.
IPL 2026 | तीन सामन्यांत केवळ 22 धावा :
या हंगामातील पहिल्या तीन सामन्यांमध्ये संजू सॅमसनची कामगिरी फारशी प्रभावी ठरलेली नाही. Punjab Kings, Royal Challengers Bengaluru आणि राजस्थान रॉयल्सविरुद्धच्या सामन्यांमध्ये तो अनुक्रमे 6, 7 आणि 9 धावांवर बाद झाला. त्यामुळे तीन सामन्यांत त्याच्या खात्यात केवळ 22 धावा जमा झाल्या आहेत.
संघाच्या सलग पराभवांमुळे फलंदाजीतील कमकुवत दुवे स्पष्टपणे दिसून आले आहेत. विशेषतः पॉवरप्ले दरम्यान संघाला चांगली सुरुवात मिळत नसल्याने मधल्या फळीत दबाव वाढत आहे. त्यामुळे आगामी सामन्यांमध्ये संजू सॅमसनने फॉर्ममध्ये परतणे संघासाठी अत्यंत महत्त्वाचे ठरणार आहे.
चेन्नई सुपर किंग्सचा पुढील सामना 11 एप्रिल रोजी दिल्ली कॅपिटल्स विरुद्ध होणार असून त्या सामन्यात सॅमसनच्या कामगिरीकडे सर्वांचे लक्ष लागले आहे.
