मनोज जरांगे पाटील यांनी समोर आणलेल्या कथित 500 कोटी रुपयांच्या ऑडिओ क्लिपवरून शिवसेना आणि भाजपमधील राजकीय वाद चिघळण्याची चिन्हे दिसत आहेत. या प्रकरणावरून शिवसेनेचे नेते रामदास कदम आणि भाजपच्या नेत्यांमध्ये आरोप-प्रत्यारोप सुरू असतानाच केंद्रीय मंत्री प्रतापराव जाधव यांनी आपली भूमिका स्पष्ट केली आहे. “आमचा आवाज कोणीच दाबू शकत नाही. ऑडिओ क्लिपमधील आरोप गंभीर असून, त्याची फॉरेन्सिक तपासणी झाली पाहिजे. सत्य जनतेसमोर आले पाहिजे,” अशी मागणी त्यांनी केली. प्रतापराव जाधव म्हणाले की, मनोज जरांगे पाटील यांनी दाखवलेली ऑडिओ क्लिप आपणही ऐकली आहे. त्यामध्ये विधानसभेचा उल्लेख असल्याने ही क्लिप जवळपास अडीच वर्षांपूर्वीची असण्याची शक्यता आहे. मात्र, विधान परिषदेच्या निवडणुकीतील मतदानाच्या एक दिवस आधीच ही क्लिप बाहेर कशी आली, याची चौकशी होणे आवश्यक आहे. शिवसेनेच्या मंत्र्यांनी मुख्यमंत्री देवेंद्र फडणवीस यांची भेट घेऊन या प्रकरणाच्या चौकशीची मागणी केली आहे. क्लिपची फॉरेन्सिक तपासणी करून सत्य बाहेर आणावे आणि दोषींवर कठोर कारवाई करावी, अशी शिवसेनेची भूमिका असल्याचे त्यांनी सांगितले. ‘एकनाथ शिंदे मजबूत नेतृत्व; बदनामीचा प्रयत्न खपवून घेणार नाही’ एकनाथ शिंदे हे महाराष्ट्रातील मराठा समाजाचे मोठे नेतृत्व असून, जनतेचा त्यांच्यावर विश्वास आहे. एका मराठा नेत्याने दुसऱ्या मराठा नेत्याची राजकीय किंवा सामाजिक प्रतिमा खराब होणार नाही, याची काळजी घेतली पाहिजे, असे जाधव म्हणाले. ऑडिओ क्लिपमधील आरोप गंभीर असल्याने त्याकडे दुर्लक्ष करता येणार नाही. मात्र, आरोपांच्या आधारे कोणालाही दोषी ठरवण्याऐवजी सखोल चौकशी करून सत्य समोर आणले पाहिजे, असेही त्यांनी स्पष्ट केले. एकनाथ शिंदे यांचे नेतृत्व मजबूत असल्याचे सांगत जाधव म्हणाले, “एकनाथ शिंदे साहेबांचा गळा इतका नाजूक नाही की कोणी केसाने कापेल.” एकमेकांवर आरोप करण्याऐवजी या प्रकरणाची चौकशी करून दोषींना जनतेसमोर आणणे हाच योग्य मार्ग आहे, असे त्यांनी नमूद केले. ‘भाजपनेच चौकशीची मागणी करावी’ ऑडिओ क्लिपमध्ये उल्लेख झालेली नावे माध्यमांनी भाजपशी संबंधित असल्याचे दाखवले आहे. त्यामुळे मित्रपक्षाच्या नेत्याला बदनाम करण्याचा प्रयत्न होत असेल, तर भाजपनेच या प्रकरणाच्या चौकशीची मागणी करावी, असे जाधव म्हणाले. मुख्यमंत्री देवेंद्र फडणवीस यांनी या प्रकरणाची तातडीने आणि सखोल चौकशी करून ‘दूध का दूध आणि पाणी का पाणी’ करावे, अशी मागणीही त्यांनी केली. भाजप नेते प्रवीण दरेकर यांनी शिवसेनेने धमकीची भाषा करू नये, अशी भूमिका मांडल्याच्या प्रश्नावर जाधव यांनी राजकीय सत्तास्थापनेचा संदर्भ दिला. एकनाथ शिंदे यांनी बंडखोरी केली नसती, तर भाजपलाही सत्तेत येण्याची संधी मिळाली नसती, असे ते म्हणाले. मुख्यमंत्री किंवा उपमुख्यमंत्रीपदाबाबतचे निर्णय हे वरिष्ठ नेतृत्व घेत असते. त्यामुळे अशा निर्णयांवर आक्षेप असेल, तर संबंधितांनी वरिष्ठ नेतृत्वाला प्रश्न विचारावेत, असेही त्यांनी स्पष्ट केले. ‘मराठा आरक्षणासाठी शिंदेंनी प्रयत्न केले’ मराठा आरक्षणाच्या मुद्द्यावर बोलताना जाधव यांनी एकनाथ शिंदे मुख्यमंत्री असताना मराठा समाजाला 10 टक्के आरक्षण देण्यात आल्याचे सांगितले. सारथीसारख्या योजनांच्या माध्यमातूनही मराठा समाजासाठी प्रयत्न करण्यात आले. ओबीसी आरक्षणाला धक्का न लावता मराठा समाजाला जास्तीत जास्त लाभ मिळवून देण्याची शिंदे यांची भूमिका होती, असे त्यांनी नमूद केले. विदर्भातील मराठा समाजातील मोठा वर्ग ओबीसी प्रवर्गात असल्याने आरक्षणाच्या प्रश्नावर सामाजिक समतोल राखणे महत्त्वाचे आहे. तरीही विदर्भातील मराठा समाजाने सामाजिक बांधिलकीतून मराठा आरक्षणाच्या मागणीला विरोध केला नसल्याचे जाधव म्हणाले. संजय राऊतांच्या वक्तव्यावर उत्तर देण्यास नकार संजय राऊत यांनी या प्रकरणात आधी गुन्हा दाखल करून नंतर एसआयटी चौकशी करण्याची मागणी केल्याबाबत विचारले असता, जाधव यांनी त्यांच्या वक्तव्यांना उत्तर देणे उचित वाटत नसल्याचे सांगितले. मात्र, ऑडिओ क्लिपमधील आरोपांची फॉरेन्सिक तपासणी झाली पाहिजे आणि दोषी कोणत्याही पक्षाशी संबंधित असले, तरी संबंधित पक्षाने या प्रकरणाची गंभीर दखल घेतली पाहिजे, असे त्यांनी स्पष्ट केले. रामदास कदम यांच्या वक्तव्यांमुळे शिवसेना संपेल, या आरोपावरही जाधव यांनी प्रतिक्रिया दिली. रामदास कदम हे शिवसेनेचे ज्येष्ठ नेते असून स्पष्ट बोलणारे नेते आहेत. एकनाथ शिंदे आणि खासदार श्रीकांत शिंदे यांना या प्रकरणात गोवण्याचा प्रयत्न चुकीचा असल्याचे ते म्हणाले. शिंदे यांच्यावर आरोप करून त्यांची प्रतिमा खराब करण्याचा प्रयत्न होत असल्यास शिवसैनिकांमध्ये नाराजी निर्माण होणे स्वाभाविक आहे, असेही त्यांनी नमूद केले. काँग्रेसकडून एकनाथ शिंदे आणि त्यांच्या मुलाच्या अटकेची मागणी होत असल्याच्या प्रश्नावर जाधव यांनी काँग्रेसवर टीका केली. देशात अशांतता निर्माण करण्याचा आणि युवकांना भडकवण्याचा प्रयत्न काँग्रेस करत असल्याचा आरोप त्यांनी केला. काँग्रेसचा जनाधार कमी झाला असून, राजकीय अस्तित्व टिकवण्यासाठी पक्षाकडून प्रयत्न सुरू असल्याचेही ते म्हणाले. हेही वाचा… मुख्यमंत्री राज्याचं वाळवंट करत आहेत:कर्जतचा टोरेंट पॉवर प्रकल्प पर्यावरणपूरक कसा? आदित्य ठाकरेंचा फडणवीसांवर हल्लाबोल रायगड जिल्ह्यातील कर्जत तालुक्यात प्रस्तावित असलेल्या टोरेंट पॉवर कंपनीच्या जलविद्युत ऊर्जा साठवण प्रकल्पावरून राज्यातील राजकीय वातावरण तापले आहे. या प्रकल्पासाठी मोठ्या प्रमाणावर वृक्षतोड होत असल्याचा आरोप करत शिवसेना ठाकरे गटाने राज्य सरकारला लक्ष्य केले आहे. या पार्श्वभूमीवर शिवसेना ठाकरे गटाचे नेते आणि आमदार आदित्य ठाकरे यांनी मुख्यमंत्री देवेंद्र फडणवीस यांच्यावर जोरदार टीका केली. राज्यभरात झाडांची कत्तल सुरू असून, अदानी आणि बिल्डरांच्या फायद्यासाठी हे सर्व सुरू असल्याचा आरोप त्यांनी केला. कर्जतमधील प्रस्तावित प्रकल्प पर्यावरणपूरक असल्याचा दावा केला जात असेल, तर त्यामागील पर्यावरणीय निकष आणि प्रत्यक्ष परिणाम सरकारने स्पष्ट करावेत, अशी मागणीही त्यांनी केली. सविस्तर वाचा… What do you feel about this post? 0% Like 0% Love 0% Happy 0% Haha 0% Sad 0% Angry Views: 3 Facebook WhatsApp Twitter/X LinkedIn Post navigation दुष्काळग्रस्त शेतकऱ्यांच्या बांधावर उतरा:अर्जापासून पंचनाम्यापर्यंत मदतीची जबाबदारी घ्या, एकनाथ शिंदेंचे शिवसेना पदाधिकाऱ्यांना निर्देश मुंबई-गोवा महामार्गावर धावत्या डंपरला भीषण आग:डिझेलची टाकी फुटली, बिबवणे येथे वाहतुकीचा खोळंबा
