सगरोळी वाळू घाटावर पोलिसांची धडक कारवाई; २४ तास उलटूनही महसूल-आरटीओ गायब!

३०+ गाड्या, ४ पोकलँड जप्त; महसूल प्रशासनाच्या निष्क्रियतेवर प्रश्नचिन्ह

बिलोली (प्रतिनिधी)- तालुक्यातील सगरोळी वाळू घाटावर सुरू असलेल्या अवैध वाळू उत्खननाविरोधात पोलिसांनी धडक कारवाई करत तब्बल ३० ते ३३ वाळू वाहतूक गाड्या आणि चार पोकलँड यंत्रे ताब्यात घेतली. मात्र, या मोठ्या कारवाईनंतरही महसूल आणि आरटीओ प्रशासनाकडून तब्बल २४ तास उलटूनही कोणतीही कार्यवाही न झाल्याने प्रशासनाच्या भूमिकेवर गंभीर प्रश्न उपस्थित होत आहेत.

पोलीस उपनिरीक्षक पंकज इंगळे यांच्या नेतृत्वाखालील विशेष पथकाने ही कारवाई केली. जप्त केलेल्या वाहनांमध्ये नियमबाह्य बदल करून तीन ब्रास ऐवजी पाच ब्रास वाळू वाहतूक करण्याची व्यवस्था करण्यात आल्याचेही उघड झाले आहे. ही बाब महसूल आणि आरटीओ नियमांचे उघड उल्लंघन आहे.

दरम्यान, पोलिसांनी गुन्हा दाखल करून सर्व जप्त वाहनांवर स्वतःच पहारा ठेवला आहे. तरीही महसूल विभाग व आरटीओ पथक घटनास्थळी न पोहोचल्याने पोलिसांच्या कारवाईवर प्रशासनाचा विश्वास नाही का? असा सवाल उपस्थित होत आहे. विशेष म्हणजे, तहसीलदारांकडून पोकलँड रस्त्याच्या कामासाठी असू शकतात असे स्पष्टीकरण देण्यात आल्याची माहिती समोर आली असून, वाळू घाटावर रस्त्याच्या कामाचा संबंध जोडण्याचा प्रयत्न नागरिकांच्या शंकांना अधिकच बळ देणारा ठरत आहे.

सगरोळी परिसरातील २६ वाळू घाट लिलावाद्वारे दिले आहेत हे वाळू घाट विजयकुमार सत्यनारायण अग्रोया रा. सोलापूर गल्ली लातूर यास दिले असल्याचे समजते, तरी प्रत्यक्षात कायद्याच्या नावाखाली बेकायदेशीर कामकाज सुरू असल्याचे आरोप आहेत. या पार्श्वभूमीवर जिल्हाधिकाऱ्यांनी तातडीने हस्तक्षेप करून महसूल प्रशासनाला कारवाईचे आदेश द्यावेत, अशी जोरदार मागणी होत आहे.पोलिसांनी ताब्यात ठेवल्या वाहनांची किंमत १५ कोटीची असावी असा अंदाज आहे.वृत्त प्रकाशीत कारे पर्यंत तरी महसूल आणि आरटीओ विभाग तेथे आले नव्हते अशी माहिती प्राप्त झाली आहे.