ठाणे महापौरांच्या चालकाकडून वृत्तवाहिनीच्या कॅमेरामनला मारहाण:मारहाण करणं चुकीचं, माझ्या चालकाला पाठीशी घालणार नाही- महापौर शर्मिला पिंपळोलकर

ठाणे महानगरपालिका मुख्यालयासमोरच एका वृत्तवाहिनीचे कॅमेरामन विनय राजभर यांना महापौरांच्या चालकाने जबर मारहाण केल्याची घटना घडली आहे. या हल्ल्यात राजभर गंभीर जखमी झाले आहेत. घटनेची माहिती मिळताच नौपाडा पोलिसांनी तत्परता दाखवत महापौर शर्मिला पिंपळोलकर यांचे चालक सुनील खरपडे यांना ताब्यात घेतले आहे. मिरा-भाईंदर येथे पत्रकार आणि कॅमेरामनवर झालेल्या हल्ल्याची घटना ताजी असतानाच, आता ठाण्यात थेट महापालिका मुख्यालयासमोरच पत्रकारावर हल्ला झाल्याने माध्यम क्षेत्रातून तीव्र संताप व्यक्त केला जात आहे. ठाणे दैनिक पत्रकार संघातर्फे या घटनेचा तीव्र निषेध नोंदवण्यात आला आहे. माध्यमांवर सतत होणाऱ्या हल्ल्यांच्या पार्श्वभूमीवर पोलिस आणि प्रशासनाने याप्रकरणी कडक कारवाई करावी, अशी मागणी केली जात आहे. चालकावर योग्य ती कारवाई केली जाईल- महापौर शर्मिला पिंपळोलकर या घटनेनंतर ठाण्याच्या महापौर शर्मिला पिंपळोलकर यांनी माध्यमांशी संवाद साधताना म्हटलंय की, ही घटना पहाटेच्या सुमारास घडली. मला एका कार्यक्रमानिमित्त बाहेर जायचे होते. त्यावेळी माझे वाहनचालक आणि कॅमेरामन यांच्यात नेमकी काय बाचाबाची झाली, याची सविस्तर माहिती मी घेत आहे. पण कारण काहीही असले, तरी माझ्या चालकाने कोणालाही मारहाण करणे पूर्णपणे चुकीचे आहे, काही वाद होता, तर तो माझ्यापर्यंत यायला हवा होता. प्रशासनाला याप्रकरणी तातडीने आणि योग्य ती कारवाई करण्याचे निर्देश मी दिले आहेत. घटनेच्या वेळी मी तिथे उपस्थित नव्हते, मात्र थोड्याच वेळात घटनास्थळी पोहोचून सर्व माहिती घेईन. शब्दांची बाचाबाची इथपर्यंत ठीक आहे, पण मारहाण करणे अत्यंत चुकीचे आहे. मग तो माझा चालक असला तरीही मी अशा कृत्याचे कधीही समर्थन करणार नाही किंवा त्याला पाठीशी घालणार नाही. हे ही वृत्त वाचा एकतर्फी प्रेमातून हॉटेल मॅनेजमेंटच्या विद्यार्थिनीची निघृण हत्या:आरोपीला 24 ऑक्टोबरपर्यंत पोलिस कोठडी, रक्ताने माखलेलं कपडे, धारदार चाकू जप्त
सिंधुदुर्ग जिल्ह्यातील कुडाळ तालुक्यातील वर्दे येथे हॉटेल मॅनेजमेंटचे शिक्षण घेणाऱ्या 23 वर्षीय दामिनी पालव हिची एकतर्फी प्रेमातून निर्घृण हत्या करण्यात आल्याचे प्राथमिक तपासात निष्पन्न झाले आहे. याप्रकरणी मुख्य आरोपी साहिल धुरी याच्यावर खुनाचा गुन्हा दाखल करण्यात आला असून, आज त्याला न्यायालयात हजर केले असता न्यायालयाने त्याला 24 ऑक्टोबरपर्यंत पोलिस कोठडी सुनावली आहे. सध्या पोलिस या प्रकरणाचा अधिक तपास करत आहेत. वाचा सविस्तर