राष्ट्रसंत तुकडोजी महाराज विद्यापीठ नागपूरचे डॉ. धर्मेश धावणकर यांचे मार्गदर्शन; २७ फेब्रुवारी रोजी आयोजन
नांदेड (विशेष प्रतिनिधी) – आर्टिफिशियल इंटेलिजन्स (AI) मुळे जगभरातील माध्यम क्षेत्रात सध्या आमूलाग्र बदल होत आहेत. या तांत्रिक क्रांतीची ओळख आणि भविष्यातील आव्हाने यावर प्रकाश टाकण्यासाठी स्वामी रामानंद तीर्थ मराठवाडा विद्यापीठाच्या माध्यम शास्त्र संकुलात एका विशेष व्याख्यानाचे आयोजन करण्यात आले आहे. नागपूर येथील प्रसिद्ध माध्यम तज्ज्ञ प्रोफेसर डॉ. धर्मेश धावणकर हे या सत्रात ‘माध्यम संशोधनात एआयची भूमिका’ या विषयावर सखोल मार्गदर्शन करणार आहेत.
सध्याच्या डिजिटल युगात पत्रकारिता, जाहिरात आणि जनसंपर्क क्षेत्रात एआयचा (AI) वापर अपरिहार्य झाला आहे. याच पार्श्वभूमीवर, विद्यार्थ्यांच्या ज्ञानात भर टाकण्यासाठी आणि तंत्रज्ञानाचे नवे दालन उलगडण्यासाठी येत्या २७ फेब्रुवारी २०२६ रोजी हे वैचारिक सत्र संपन्न होणार आहे. माध्यम क्षेत्रातील वाढता तंत्रज्ञानाचा प्रभाव आणि कृत्रिम बुद्धिमत्तेचा संशोधनातील वापर यावर डॉ. धावणकर आपले विचार मांडतील.
या उपक्रमाविषयी बोलताना माध्यम शास्त्र संकुलाचे संचालक प्रा. डॉ. सुहास पाठक म्हणाले की, सध्याच्या काळात केवळ पदवी मिळवणे पुरेसे नसून, जागतिक स्तरावर होणाऱ्या तांत्रिक बदलांची माहिती असणे ही काळाची गरज आहे. त्यांनी संकुलातील सर्व आजी-माजी विद्यार्थ्यांना या व्याख्यानाचा लाभ घेण्याचे आणि मोठ्या संख्येने उपस्थित राहण्याचे आवाहन केले आहे.
या महत्त्वपूर्ण कार्यक्रमाच्या यशस्वीतेसाठी माध्यम शास्त्र संकुलाचे प्राध्यापक राजेंद्र गोणारकर, डॉ. सचिन नरंगले, डॉ. कैलाश यादव आणि गिरीश जोंधळे हे विशेष परिश्रम घेत आहेत. हे व्याख्यान विद्यापीठ परिसरातील माध्यम शास्त्र संकुलाच्या सभागृहात पार पडणार असून, या निमित्ताने विद्यार्थ्यांशी संवाद साधण्याची सुवर्णसंधी उपलब्ध होणार आहे.
Post Views: 5
