नागपुरात मोकाट वळूचा उपद्रव:महिलेला धडक देऊन जमिनीवर आपटले अन् शिंगांनी भोसकले, प्रकृती चिंताजनक

नागपूर शहरात भटक्या कुत्र्यांच्या त्रासानंतर आता मोकाट सांडांचा उपद्रव वाढला आहे. येथील सन्मान नगर परिसरात २७ जानेवारी रोजी सकाळी एका ६४ वर्षीय महिलेवर मोकाट सांडाने हल्ला केला. या हल्ल्यात महिला गंभीर जखमी झाली असून तिच्यावर रुग्णालयात उपचार सुरू आहेत. मिळालेल्या माहितीनुसार, वंदना देवीकर (वय ६४) या सकाळी साडेसात वाजता आपल्या घरासमोर रस्ता झाडत असताना अचानक एका मोकाट सांडाने त्यांच्यावर हल्ला केला. सांडाने त्यांना जोरदार धडक देऊन जमिनीवर आपटले आणि शिंगांनी भोसकले. हा हल्ला इतका अचानक होता की शेजाऱ्यांना मदतीला धाव घेण्याची संधीही मिळाली नाही. आरडाओरड ऐकून परिसरातील नागरिकांनी तत्काळ धाव घेतली आणि सांडाला हुसकावून लावले. गंभीर जखमी अवस्थेत देवीकर यांना जवळच्या खासगी रुग्णालयात दाखल करण्यात आले. तपासणीत त्यांच्या बरगड्या व हातापायांची हाडे मोडल्याचे निष्पन्न झाले. डोक्याला जबर मार लागल्याने त्यांच्या मेंदूला गंभीर दुखापत झाली आहे. देवीकर यांच्यावर तातडीने शस्त्रक्रिया करण्यात आली. त्या जवळपास तीन आठवडे अतिदक्षता विभागात मृत्यूशी झुंज देत होत्या. सध्या त्या घरीच उपचार घेत असून, कृत्रिम ऑक्सिजनच्या सहाय्याने त्यांची प्रकृती स्थिर ठेवण्याचा प्रयत्न सुरू आहे. दरम्यान, हल्ला करणारा सांड अजूनही त्याच परिसरात मोकाट फिरत असल्याचा आरोप स्थानिक नागरिकांनी केला आहे. या घटनेमुळे परिसरात भीतीचे वातावरण असून, लहान मुले, ज्येष्ठ नागरिक आणि महिला घराबाहेर पडताना घाबरत आहेत. नागरिकांनी महानगरपालिकेच्या जनावर पकडणाऱ्या पथकाच्या कार्यक्षमतेवर प्रश्नचिन्ह उपस्थित केले आहे.