अमरावती महानगरपालिकेने (मनपा) शहरातील स्वच्छतेच्या वाढत्या तक्रारींची दखल घेत २६ फेब्रुवारी रोजी विशेष आमसभा बोलावली आहे. महापौर श्रीचंद तेजवानी यांच्या अध्यक्षतेखाली सकाळी ११ वाजता ही सभा होणार असून, यात केवळ शहर स्वच्छतेच्या मुद्द्यांवर चर्चा करून उपाययोजना निश्चित केल्या जातील. या सभेसाठी सर्व नगरसेवकांना निमंत्रण पाठवण्यात आले आहे. पीठासीन सभापतींनी नगरसेवकांना आपापल्या प्रभागातील स्वच्छतेच्या समस्या आणि त्यावर अपेक्षित उपाययोजना सादर करण्याचे आवाहन केले आहे. यापूर्वी २० फेब्रुवारी रोजी झालेल्या मनपाच्या पहिल्याच आमसभेत अनेक नगरसेवकांनी स्वच्छतेचा मुद्दा उपस्थित केला होता. मात्र, त्यावेळी स्थायी समितीच्या १६ सदस्यांची आणि स्वीकृत सदस्यांची निवड करण्याला प्राधान्य देण्यात आले होते. त्यावेळी पीठासीन सभापतींनी स्वच्छतेच्या विषयावर विशेष सभा घेण्याचे आश्वासन दिले होते. त्यानुसार, महापौर श्रीचंद तेजवानी यांनी २६ फेब्रुवारी रोजी विशेष आमसभेचे आयोजन करून दिलेला शब्द पाळला आहे.
स्वच्छतेवर मनपाची विशेष आमसभा:26 फेब्रुवारी रोजी महापौर तेजवानींच्या अध्यक्षतेखाली चर्चा
