नागपुरात वर्षातील सरासरी १५० दिवस हवा प्रदूषित असते, अशी धक्कादायक माहिती समोर आली आहे. केंद्रीय प्रदूषण नियंत्रण मंडळाच्या निरीक्षणांवर आधारित एका संशोधन अहवालातून ही बाब उघड झाली आहे. नागपूरकरांना वाहतूक कोंडीसोबतच आता खराब हवेमुळे होणाऱ्या आरोग्या
.
अहवालानुसार, शहरातील विविध भागांमध्ये प्रदूषित दिवसांची संख्या लक्षणीय आहे. महाल परिसरात सर्वाधिक १८० दिवस हवा प्रदूषित आढळली, तर जीपीओ चौकात १७४ दिवस, रामनगरमध्ये १५४ दिवस आणि अंबाझरीमध्ये १३७ दिवस हवा प्रदूषित होती.
मागील वर्षातील केंद्रीय प्रदूषण नियंत्रण मंडळाच्या आकडेवारीनुसार, अंबाझरी भागात ३६५ दिवसांपैकी २२८ दिवस हवा चांगली किंवा समाधानकारक होती, तर १३७ दिवस प्रदूषित आढळली. महालमध्ये १८० दिवस प्रदूषित आणि १८५ दिवस चांगली हवा होती. रामनगरमध्ये १५४ दिवस प्रदूषित तर २११ दिवस चांगली हवा नोंदवली गेली, तर जीपीओ येथे १७४ दिवस प्रदूषित आणि १९१ दिवस चांगली हवा होती.
नागपुरातील वाढत्या प्रदूषणामागे अनेक कारणे आहेत. प्रामुख्याने वाहतूक, वाहनांचा धूर, औष्णिक ऊर्जा प्रकल्प आणि उद्योगांमधून होणारे वायू प्रदूषण यासाठी जबाबदार आहे. याशिवाय, आधुनिक जीवनशैलीमुळे घरात आणि घराबाहेरही वायू प्रदूषणात वाढ झाली आहे. कचरा जाळणे, लाकूड आणि कोळसा वापरणे यामुळेही हवेची गुणवत्ता खालावत आहे.
या वाढत्या वायू प्रदूषणामुळे नागरिकांच्या आरोग्यावर गंभीर परिणाम होत आहेत. सरकारी आणि खासगी रुग्णालयांमध्ये दमा, श्वसन विकार, टीबी, कर्करोग, सर्दी, खोकला, डोळ्यांचे आजार, त्वचेचे विकार आणि हृदयरोगांच्या रुग्णांमध्ये वाढ झाल्याचे प्रा. सुरेश चोपणे यांनी सांगितले.
