पुण्यात शेअर बाजारात गुंतवणुकीचे आमिष दाखवून सायबर चोरट्यांनी एका ज्येष्ठ नागरिकाची २९ लाख रुपयांची फसवणूक केली आहे. याप्रकरणी अलंकार पोलीस ठाण्यात सायबर चोरट्यांविरुद्ध गुन्हा दाखल करण्यात आला आहे.
.
पोलिसांनी दिलेल्या माहितीनुसार, कर्वे रस्त्यावर राहणाऱ्या ७८ वर्षीय ज्येष्ठ नागरिकाला सायबर चोरट्यांनी त्यांच्या मोबाइल क्रमांकावर संदेश पाठवला होता. शेअर बाजारात गुंतवणूक केल्यास चांगला परतावा मिळेल, असे आमिष त्यांना दाखवण्यात आले.
सुरुवातीला, ज्येष्ठाने चोरट्यांच्या खात्यात काही रक्कम जमा केली. चोरट्यांनी त्यांना परतावा मिळाल्याचे भासवले, मात्र प्रत्यक्षात कोणताही परतावा दिला नाही. त्यानंतर चोरट्यांनी त्यांना आणखी रक्कम गुंतवण्यास सांगितले.
या आमिषाला बळी पडून ज्येष्ठाने वेळोवेळी चोरट्यांच्या बँक खात्यात एकूण २९ लाख ३० हजार रुपये जमा केले. रक्कम गुंतवल्यानंतरही परतावा न मिळाल्याने त्यांनी चोरट्यांशी संपर्क साधण्याचा प्रयत्न केला, परंतु त्यांना कोणताही प्रतिसाद मिळाला नाही. आपली फसवणूक झाल्याचे लक्षात येताच त्यांनी पोलिसांकडे तक्रार दिली. वरिष्ठ पोलीस निरीक्षक सुनीता रोकडे या प्रकरणाचा तपास करत आहेत.
शेअर ट्रेडिंगमध्ये गुंतवणुकीच्या बहाण्याने फसवणूक
दरम्यान, शेअर ट्रेडिंगमध्ये गुंतवणुकीच्या बहाण्याने फसवणूक झाल्याची आणखी एक घटना समोर आली आहे. कात्रज येथील एका ३४ वर्षीय तरुणाची साडेबारा लाख रुपयांची फसवणूक झाली आहे.
ही घटना १८ ऑगस्ट २०२५ ते १९ नोव्हेंबर २०२५ या कालावधीत ऑनलाइन घडली. याप्रकरणी तरुणाने दिलेल्या तक्रारीवरून गुन्हा दाखल करण्यात आला असून, भारती विद्यापीठ पोलीस ठाण्याचे पोलीस निरीक्षक (गुन्हे) गजानन चोरमले पुढील तपास करत आहेत.
