कोरेगाव भीमा येथे १ जानेवारी २०२६ रोजी आयोजित जयस्तंभ अभिवादन कार्यक्रमाच्या पार्श्वभूमीवर पुणे-नगर महामार्गावरील वाहतुकीत बदल करण्यात आले आहेत. वाहतूक कोंडी टाळण्यासाठी ३१ डिसेंबर रोजी दुपारी दोन वाजल्यापासून हे बदल लागू होतील.
.
राज्याच्या विविध भागांतून आंबेडकरी चळवळीतील अनुयायी या सोहळ्यासाठी उपस्थित राहणार असल्याने वाहतूक व्यवस्थेत बदल करण्याचा निर्णय घेण्यात आला आहे. हे वाहतूक बदल १ जानेवारी २०२६ रोजी रात्री १२ वाजेपर्यंत लागू राहतील, अशी माहिती वाहतूक शाखेचे पोलीस उपायुक्त हिंमत जाधव यांनी दिली.
पुण्याकडून नगरकडे जाणाऱ्या वाहनांनी खराडी बाह्यवळण मार्गावरून मुंढवा, मगरपट्टा चौक, पुणे-सोलापूर रस्ता, केडगाव चौफुला, न्हावरा, शिरूरमार्गे नगर रस्त्याकडे जावे. सोलापूर रस्त्याने आळंदी, चाकणकडे जाणाऱ्या वाहनांनी हडपसर, मगरपट्टा चौक, खराडी बाह्यवळण मार्गावरून विश्रांतवाडीकडे जाऊन तेथून आळंदी आणि चाकणकडे जावे.
मुंबईकडून नगरकडे जाणाऱ्या अवजड वाहनांनी वडगाव मावळ, चाकण, खेड, मंचर, नारायणगाव, आळेफाटामार्गे नगरकडे जावे. हलक्या वाहनांसाठी वडगाव मावळ, चाकण, खेड, पाबळ, शिरूरमार्गे नगरकडे जाण्याचा मार्ग उपलब्ध असेल.
कोल्हापूर, सांगली, सातारा, कात्रजमार्गे मंतरवाडी फाटा, मगरपट्टा चौक येथून नगरकडे जाणाऱ्या वाहनचालकांनी हडपसर येथून केडगाव चौफुलामार्गे शिरूरकडे जावे. इंद्रायणी नदीवरील आळंदी-तुळापूर पूल जड वाहतुकीस बंद करण्यात आला असून, या पुलावरून केवळ अनुयायांच्या हलक्या वाहनांना प्रवेश दिला जाईल. विश्रांतवाडी, लोहगावमार्गे वाघोलीकडे जाणारी जडवाहतूकही बंद ठेवण्यात येणार आहे.
जयस्तंभ अभिवादन सोहळ्यासाठी येणाऱ्या अनुयायांसाठी प्रशासनाने वाहनतळांची सोय केली आहे. लोणीकंद येथील आपले घर, बौद्ध वस्ती, तुळापूर फाटा स्टफ कंपनीशेजारी (मोटारी व हलकी चारचाकी वाहने), आपले घर शेजारील वाहनतळ, मोनिका हॉटेलशेजारी, तुळापूर फाटा रौनक स्वीटजवळ (दुचाकी वाहने), तसेच थेऊर रस्ता, खंडोबाचा माळ, लोणीकंद आपले घर सोसायटीजवळील मोकळी जागा (बस, टेम्पो) येथे वाहने उभी करता येतील. याव्यतिरिक्त पेरणे गाव छत्रपती शिवाजी महाराज पुतळ्याजवळील मोकळे मैदान, थेऊर रस्ता, ज्ञानमुद्रा ॲकॅडमी मैदान आणि सोमवंशी ॲकॅडमी येथेही पार्किंगची व्यवस्था आहे.
शहरात जड वाहनांना बंदी घालण्यात आली आहे. लोणी काळभोर परिसरातील थेऊर फाटा, खडकीतील हॅरीस पूल, विश्रांतवाडीतील बोपखेल फाटा, बाणेरमधील राधा चौक, सिंहगड रस्ता भागातील नवले पूल, कात्रज चौक, कोंढव्यातील खडी मशीन चौक, फुरसुंगीतील मंतरवाडी फाटा, मरकळ पूल येथून शहरात येणाऱ्या सर्व प्रकारच्या जड वाहनांना प्रवेश बंद असेल.
