मुख्यमंत्री देवेंद्र फडणवीस यांनी सातारा ड्रग्ज प्रकरणात उपमुख्यमंत्री एकनाथ शिंदे यांच्यावर होणारे आरोप जोरकसपणे फेटाळून लावलेत. प्रस्तुत प्रकरणात आतापर्यंत हाती लागलेल्या पुराव्यांमध्ये एकनाथ शिंदे किंवा त्यांच्या कुटुंबाचा कोणताही संबंध दुरान्वयेह
.
मुख्यमंत्री देवेंद्र फडणवीस आज सकाळी पत्रकारांशी बोलताना म्हणाले, सर्वप्रथम मी पोलिस विभागाचे अभिनंदन करतो. त्यांनी त्या ठिकाणी सुरू असलेल्या धंद्याचा पर्दाफाश केला. त्याच्यावर मोठी कारवाई केली. या संपूर्ण प्रकरणात जाणिवपूर्वक राजकीयदृष्ट्या कुठेतरी उपमुख्यमंत्री एकनाथ शिंदे यांचे नाव आणण्याचा प्रयत्न सुरू आहे. तो चुकीचा आहे. तो निषेधार्ह आहे. या प्रकरणात आतापर्यंत हाती लागलेल्या पुराव्यांमध्ये त्यांचा किंवा त्यांच्या कुटुंबातील कोणताही संबंध दुरान्वयेही आला नाही. त्यामुळे मला असे वाटते की, कुठेतरी दिशाभूल करून अशा पद्धतीने संबंध जोडणे योग्य नाही. यासंदर्भात सरकार पूर्ण चौकशी करत आहे.
मुख्यमंत्र्यांनी यावेळी मुंबई महापालिकेतील शिवसेना – भाजप युतीचे जागावाटप योग्यपणे सुरू असल्याचेही स्पष्ट केले. महायुतीचे जागावाटप चांगल्या पद्धतीने सुरू आहे. आमचे दोन्हीकडले नेते नीट महायुतीचे जागावाटप करत आहेत. हे जागावाटप 2 दिवसांत पूर्ण होईल असे वाटते, असे ते म्हणाले.
न्यायव्यवस्थेचा आदर राखा, कोण चूक कोण बरोबर ठरवू नका – सुषमा अंधारे
दुसरीकडे, शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी सातारा ड्रग्ज प्रकरणात एकनाथ शिंदेंना क्लीनचिट देण्याच्या मुद्यावर जोरदार आक्षेप घेतला आहे. त्या म्हणाल्या, माननीय मुख्यमंत्र्यांनी आज माध्यमांना बोलताना उपमुख्यमंत्र्यांना क्लीन चीट देण्याचा पुन्हा एकदा धाडसी प्रयत्न केला आहे. ( आपल्याला त्यांची खरेच किती काळजी आहे हे मी पुन्हा कधीतरी स्पष्ट करेल). तूर्तास माझी मुख्यमंत्र्यांना पुन्हा एकदा विनंती आहे, कृपया न्यायव्यवस्थेचा आदर राखा. कोण चूक कोण बरोबर हे ठरवण्याचा अधिकार आपला नाही, तो न्यायव्यवस्थेचा आहे. अशा पद्धतीची वक्तव्य करून आपण तपास यंत्रणा प्रभावित करत आहात.
शिंदे गुन्हेगार हे कुठेही म्हणाले नाही
सुषमा अंधारे म्हणाल्या, एकनाथ शिंदे हे गुन्हेगार आहेत असे माझे वक्तव्य कुठेही नाही. मात्र प्रकाश शिंदे याची चौकशी झाली पाहिजे यावर मी आजही ठाम आहे आणि प्रकाश शिंदे यांची चौकशी राजकीय शक्तींनी प्रभावित करू नये यासाठी त्यांचे सख्खे भाऊ म्हणून एकनाथ शिंदे यांनी ही चौकशी पूर्ण होईपर्यंत पदापासून दूर राहावे. त्यांचे भाऊ निर्दोष झाल्यानंतर त्यांनी पुन्हा उपमुख्यमंत्री काय अगदी “मुख्यमंत्री” सुद्धा व्हावे. अभिनंदनचा पुष्पगुच्छ घेऊन मी स्वतः येईल.
पण मुख्यमंत्र्यांनी जरा गांभीर्याने विचार करावा. जात धर्म आणि पक्षीय राजकारणाच्या पलीकडे जाऊन मी महाराष्ट्रातल्या १४ कोटी जनतेच्या भविष्यासाठी लढत आहे कृपया आपण माझा लढा Demoralise करू नये, असे त्यांनी म्हटले आहे. सुषमा अंधारे या प्रकरणी आज पुन्हा एकदा पत्रकारांशी संवाद साधणार आहेत.
