Mateen Patel Denies Knowing Nida Khan; Claims No Imtiyaz Jalil Link

.

निदा खानसोबतच्या भेटीबाबत माहिती देताना एबीपी माझाशी बोलताना मतीन पटेल म्हणाले, “मी निदा खानला वैयक्तिकरित्या ओळखत नव्हतो. तिच्या आई-वडिलांनी मदतीसाठी फोन केला होता, म्हणून मी तिला दोन-तीन दिवसांसाठी रूम दिली होती. एकदा तिचा दूध आणि खारीसाठी फोन आला होता, तेव्हा मी मुलामार्फत ते साहित्य पाठवले होते. मात्र, निदा खान कोण आहे आणि तिची पार्श्वभूमी काय आहे, याची मला कल्पना नव्हती.”

इम्तियाज जलील यांचे नाव चर्चेत का?

मागील चौकशीत मतीन पटेलने इम्तियाज जलील यांच्याशी संपर्क झाल्याचे कबूल केले होते. त्यावर स्पष्टीकरण देताना ते म्हणाले, “इम्तियाज जलील हे माझे नेते आहेत. मला कोणतीही अडचण आली की मी त्यांना फोन करतो. या प्रकरणात त्यांना काहीही माहिती नव्हती आणि निदा खान ही त्यांची नातेवाईकही नाही. जो कोणी असे आरोप करत आहे, तो खोटे बोलत आहे. माझ्या फोनमध्ये सर्व रेकॉर्डिंग्स असून त्यातून सत्य समोर येईलच.”

प्रशासकीय कारवाईवर नाराजी

या प्रकरणानंतर प्रशासनाने मतीन पटेल यांच्या घरावर हातोडा चालवला आहे. यावर संताप व्यक्त करताना ते म्हणाले, “केलेल्या आरोपांमध्ये तथ्य आहे की नाही, हे अद्याप सिद्ध झालेले नाही. तरीही माझे घर पाडून माझ्या आई-वडील आणि भावाला रस्त्यावर आणले आहे. मी ज्याला घर विकले, त्यालाही आरोपी करून त्याचे घर पाडण्यात आले. हे पूर्णपणे चुकीचे असून मी याविरोधात न्यायालयात कायदेशीर लढाई लढणार आहे.”

एसआयटीच्या तपासाची दिशा

एसआयटी सध्या मतीन पटेल यांचा मोबाईल डेटा आणि फोन कॉल्स रिकव्हर करण्याचे काम करत आहे. निदा खानला आश्रय देण्यामागे नेमका कोणाचा हात होता किंवा कोणाच्या सांगण्यावरून हे घडले, याचा तपास पोलीस करत आहेत. यापूर्वी दोनवेळा चौकशी झाली असून, आजच्या तिसऱ्या फेरीतील चौकशीतून नवीन माहिती समोर येण्याची शक्यता आहे.

हे ही वाचा…