अकोला पोलिस दलातील सेवानिवृत्त अधिकारी, अंमलदारांचा केला सत्कार
जिल्हा पोलीस दलातर्फे मे २०२६ मध्ये सेवानिवृत्त झालेल्या पोलीस अधिकारी आणि अंमलदार यांचा सत्कार सोहळा नुकताच अत्यंत उत्साहात आणि भावपूर्ण वातावरणात पार पडला. हा कार्यक्रम सोमवारी (दि. १) सकाळी ११ वाजता येथील पोलिस अधीक्षक कार्यालयातील विजय हॉलमध्ये घेण्यात आला. पोलिस अधीक्षक अर्चित चांडक यांच्या मार्गदर्शनाखाली या विशेष सत्कार सोहळ्याचे आयोजन करण्यात आले होते. या सोहळ्यात मे २०२६ मध्ये अकोला पोलिस घटकातून सेवानिवृत्त झालेले एकूण १० अधिकारी व अंमलदारांचा यथोचित सन्मान करण्यात आला. यामध्ये पोलिस उपनिरीक्षक सुनील भटकर, श्रेणी पोलिस उपनिरीक्षक सुनील सोयाम, महिला सहाय्यक पोलिस उपनिरीक्षक चित्रलेखा आंभोरे, तसेच सहाय्यक पोलिस उपनिरीक्षक सूरज मंगरुळकर, किशोर भेंडे, अरुण काकड, संजय मथने, रमेश बलखंडे आणि पोलीस हवालदार संतोष नेवारे व सुभाष दंदी यांचा समावेश आहे. या सत्कार सोहळ्याला सेवानिवृत्त पोलिस अधिकारी व अंमलदारांचे कुटुंबीय उपस्थित असल्याने कार्यक्रमात अत्यंत आनंदाचे वातावरण पाहायला मिळाले. सत्कारमूर्तींनी आणि त्यांच्या कुटुंबीयांनी आपले मनोगत व्यक्त करताना प्रदीर्घ सेवेबद्दल समाधान व्यक्त केले. अशा प्रकारचा सन्माननीय सोहळा आयोजित केल्याबद्दल पोलिस प्रशासनाचे विशेष आभार मानले. यावेळी पोलिस अधीक्षक अर्चित चांडक यांनी सर्व सेवानिवृत्त अधिकारी व अंमलदारांच्या परिवाराची विचारपूस केली. निवृत्तीनंतर सर्वांनी स्वतःच्या आरोग्याची काळजी घ्यावी, आवडते छंद जोपासावेत आणि कुटुंबाला पुरेसा वेळ द्यावा, असा मोलाचा सल्ला दिला. सर्वांचे अभिनंदन करून पुढील वाटचालीस शुभेच्छा दिल्या. यशस्वितेसाठी राखीव पोलिस निरीक्षक व त्यांच्या पथकाने विशेष परिश्रम घेतले. पोलिस हवालदार गोपाल मुकुंदे यांनी सूत्रसंचालन करत आभार मानले.