विधान परिषदेसाठी भाजपचे उमेदवार जाहीर:प्राजक्त तनपुरे यांना संधी, सुप्रिया सुळेंच्या होणाऱ्या व्याह्यांनाही उमेदवारी; पाहा यादी

राज्यातील राजकीय हालचालींना वेग आला असून, आगामी विधान परिषद निवडणुकीसाठी भारतीय जनता पक्षाने आपल्या उमेदवारांची पहिली यादी प्रसिद्ध केली आहे. पक्षाचे राष्ट्रीय सरचिटणीस अरुण सिंह यांच्या स्वाक्षरीने प्रसिद्ध झालेल्या या अधिकृत पत्रात ११ मतदारसंघांतील उमेदवारांच्या नावांची घोषणा करण्यात आली आहे. विशेष म्हणजे, नुकताच भाजपमध्ये प्रवेश केलेले प्राजक्त तनपुरे आणि सुप्रिया सुळे यांचे होणारे व्याही अरुण लखाणी यांना भाजपने संधी दिली आहे. विशेष म्हणजे, प्रदीर्घ चर्चा आणि दिल्लीतील वरिष्ठ नेत्यांच्या बैठकीनंतर या नावांवर रात्री उशिरा अधिकृत शिक्कामोर्तब करण्यात आले. भाजपने या यादीच्या माध्यमातून विदर्भ, मराठवाडा, खान्देश आणि पश्चिम महाराष्ट्र या सर्वच विभागांतील प्रादेशिक समतोल साधण्याचा प्रयत्न केला आहे. स्थानिक स्वराज्य संस्था मतदारसंघांमधील विजयाचे गणित लक्षात घेऊन भाजपने त्या-त्या भागातील प्रभावशाली नेत्यांना उमेदवारी दिली आहे. अहिल्यानगरमधून प्राजक्त तनपुरे यांना उमेदवारी देऊन भाजपने या भागात आपली पकड मजबूत करण्याचा प्रयत्न केला आहे. तसेच, वर्धा-चंद्रपूर-गडचिरोली या मतदारसंघातून अरुण लखाणी यांना मैदानात उतरवण्यात आले आहे. लखाणी हे खासदार सुप्रिया सुळे यांच्या कन्या रेवती सुळे यांचे होणारे सासरे असल्याने त्यांच्या उमेदवारीची राजकीय वर्तुळात जोरदार चर्चा रंगली आहे. भाजपचे अधिकृत उमेदवार खालीलप्रमाणे दिल्लीतून झाली घोषणा विधान परिषद निवडणुकीसाठी कुणाला संधी द्यायची, याबाबत गेल्या अनेक दिवसांपासून भाजपमध्ये खलबतं सुरू होती. राज्यस्तरावर झालेल्या विविध बैठकांनंतर ४८ संभाव्य उमेदवारांची नावे निश्चित करण्यात आली होती. ही यादी प्रदेशाध्यक्ष रवींद्र चव्हाण यांनी पक्षाचे प्रभारी नितीन नबीन यांच्याकडे सोपवली होती. त्यानंतर दिल्लीत वरिष्ठ नेत्यांच्या उपस्थितीत झालेल्या महत्त्वाच्या बैठकीनंतर आज अंतिम ११ नावांची घोषणा करण्यात आली. उद्या शक्तिप्रदर्शन करत अर्ज भरणार पक्षाने उमेदवारी जाहीर केल्यानंतर आता हे सर्व ११ उमेदवार उद्या आपापल्या संबंधित मतदारसंघात निवडणूक निर्णय अधिकाऱ्यांकडे उमेदवारी अर्ज दाखल करणार आहेत. यावेळी भाजपचे ज्येष्ठ नेते आणि पदाधिकारी मोठ्या संख्येने उपस्थित राहण्याची शक्यता असून, या अर्जांनंतर विधान परिषदेच्या रणधुमाळीला खऱ्या अर्थाने सुरुवात होणार आहे. १८ जून रोजी मतदान, २२ जूनला मतमोजणी विधान परिषदेच्या निवडणूक कार्यक्रमाची अधिसूचना २५ मे २०२६ रोजी जारी करण्यात आजी. अर्ज भरण्याची शेवटची तारीख १ जून आहे. तर अर्जांची छाननी २ जून रोजी होणार आहे. उमेदवारांना अर्ज मागे घेण्यासाठी शेवटची तारीख ४ जून आहे. विधान परिषद निवडणुकीसाठी १८ जून रोजी सकाळी ८ ते दुपारी ४ वाजेपर्यंत मतदान प्रक्रिया पार पडणार आहे. तर मतमोजणी २२ जून रोजी होणार आहे.