ग्रामिण पोलिसांच्या ताफ्यात गस्तीसाठी अद्यावयत दुचाकी:अचलपूर, परतवाडा पोलिस ठाण्यात हद्दीत करणार वापर
अमरावती ग्रामीण पोलीस दलाने आपल्या कार्यक्षमतेत आणि नागरिकांच्या सुरक्षेत मोलाची भर घालत एक महत्त्वाचे पाऊल उचलले आहे. अमरावती ग्रामीण पोलीस घटकात आता चार नवीन अत्याधुनिक ‘चार्ली मोबाईल’ पेट्रोलिंग दुचाकींचा समावेश करण्यात आला आहे. या दुचाकी अचलपूर व परतवाडा पोलीस ठाण्यांना देण्यात आल्या आहेत. या अद्ययावत दुचाकींमुळे आपत्कालीन प्रतिसाद आणि पोलिसिंगची प्रक्रिया आता अधिक जलद व प्रभावी होण्याची शक्यता आहे. या ‘चार्ली मोबाईल’ पेट्रोलिंग दुचाकी अत्याधुनिक तंत्रज्ञानाने सज्ज आहेत. यामध्ये प्रामुख्याने बॉडी-वॉर्न कॅमेरा, सार्वजनिक सूचना प्रणाली (पी.ए. सिस्टिम), वॉकी-टॉकी, सायरन, बीकन लाईट्स अशा अद्ययावत सुविधांचा समावेश करण्यात आला आहे. या तांत्रिक सुविधांमुळे पोलिसांना अधिक प्रभावी संवाद साधणे शक्य होणार आहे. तत्पर प्रतिसाद देणे शक्य होणार आहे. कारवाईत पारदर्शकता राखणे शक्य होणार आहे. आपत्कालीन प्रसंगी घटनास्थळी जलद पोहोचणे शक्य होणार आहे. पोलीस प्रशासनातर्फे या वाहनांचा प्रभावी वापर करण्यासाठी विविध रणनीती आखण्यात आल्या आहेत. यामध्ये दाट वस्ती व संवेदनशील भागांत नियमित पेट्रोलिंग करणे, महिलांच्या सुरक्षेसाठी गस्त वाढवणे, त्वरित प्रतिसाद देणे, संशयास्पद हालचालींवर तात्काळ नियंत्रण मिळवणे या गोष्टींना प्राधान्य देण्यात आले आहे. सदर दुचाकी वाहनांचे वितरण पोलीस अधीक्षक निकेतन कदम यांच्या हस्ते करण्यात आले. अशा एकूण चार दुचाकी वाहनांचे हस्तांतरण करण्यात आले. यावेळी अपर पोलीस अधीक्षक दत्ता तोटेवाड, सहायक पोलीस अधीक्षक सागर भामरे, प्रभारी पोलिस उप अधीक्षक (गृह) अशोक लांडे, पोलीस निरीक्षक संजय पवार यांच्यासह इतर अधिकारी व अंमलदार मोठ्या संख्येने उपस्थित होते.
