भाजपमध्येच मतभेद उघड? सोमय्यांच्या विरोधाला भाजपमधूनच धक्का?:कुर्बानीच्या पत्रामुळे नेत्यावर पक्षाची कारवाईची टांगती तलवार
मुंबईत बकरी ईदच्या पार्श्वभूमीवर कुर्बानीच्या मुद्द्यावरून भाजपमध्येच नवा वाद निर्माण झाल्याचे चित्र समोर आले आहे. काही दिवसांपासून सोसायट्यांमध्ये बकऱ्यांची कुर्बानी देण्यास विरोध करणारे भाजप नेते किरीट सोमय्या आक्रमक भूमिका घेत होते. अनेक ठिकाणी या मुद्द्यावरून वादही झाले. घाटकोपरमधील सागर पार्क सोसायटीमध्येही किरीट सोमय्या यांनी जाऊन कुर्बानीला विरोध दर्शवला होता. मात्र, याच प्रकरणात आता एक धक्कादायक बाब समोर आल्याने भाजपच्या स्थानिक संघटनेत खळबळ उडाली आहे. मिळालेल्या माहितीनुसार, सागर पार्क सोसायटीकडून कुर्बानीसाठी परवानगी मागण्यात आली होती. विशेष म्हणजे या पत्रावर स्वाक्षरी करणारे व्यक्ती दुसरे तिसरे कोणी नसून भाजपचे ईशान्य मुंबईतील प्रमुख पदाधिकारी चंद्रकांत मालकर असल्याचे समोर आले आहे. चंद्रकांत मालकर हे सोसायटीचे सचिव म्हणून कार्यरत असून त्याचबरोबर भाजपच्या संघटनात्मक जबाबदारीतही महत्त्वाच्या पदावर आहेत. त्यामुळे पक्षाच्या अधिकृत भूमिकेशी विसंगत वाटणाऱ्या या घडामोडीमुळे राजकीय चर्चांना उधाण आले आहे. कुर्बानीसाठी परवानगी मागणाऱ्या पत्रातील स्वाक्षरी आणि त्यानंतर समोर आलेल्या माहितीमुळे भाजप नेतृत्वानेही याची गंभीर दखल घेतली आहे. किरीट सोमय्या यांनी या संपूर्ण प्रकाराबाबत नाराजी व्यक्त करत चंद्रकांत मालकर यांना पत्र लिहिल्याची माहिती समोर आली आहे. पक्षाच्या भूमिकेला धक्का पोहोचेल असे कोणतेही पाऊल का उचलण्यात आले, याबाबत त्यांनी प्रश्न उपस्थित केल्याचे सांगितले जात आहे. त्यामुळे हा वाद आता केवळ सोसायटीपुरता मर्यादित न राहता पक्षांतर्गत चर्चेचा विषय बनला आहे. या प्रकरणानंतर भाजपच्या ईशान्य मुंबई विभागाकडूनही हालचाली सुरू झाल्या आहेत. जिल्हाध्यक्ष दीपक दळवी यांनी चंद्रकांत मालकर यांच्याकडून अधिकृत खुलासा मागितला आहे. परवानगी मागण्यामागील नेमके कारण काय होते, ती प्रक्रिया कोणत्या भूमिकेतून करण्यात आली आणि पक्षाच्या भूमिकेशी त्याचा संबंध काय, याबाबत स्पष्टीकरण देण्यास सांगण्यात आले आहे. त्यामुळे आता मालकर यांचा खुलासा काय असणार, याकडे पक्षातील पदाधिकारी आणि कार्यकर्त्यांचे लक्ष लागले आहे. भाजप तसेच काही हिंदुत्ववादी संघटना आक्रमक दरम्यान, गेल्या काही दिवसांपासून कुर्बानीच्या मुद्द्यावर भाजप तसेच काही हिंदुत्ववादी संघटना आक्रमक भूमिका घेत होत्या. सोसायट्यांमध्ये अशा प्रकारच्या धार्मिक कृतींना परवानगी देऊ नये, अशी मागणी अनेक ठिकाणी करण्यात आली होती. घाटकोपरमधील सागर पार्कमध्येही याच पार्श्वभूमीवर किरीट सोमय्या यांनी प्रत्यक्ष भेट देऊन विरोध नोंदवला होता. त्यामुळे त्याच सोसायटीच्या व्यवस्थापनाकडून परवानगीसाठी अर्ज करण्यात आल्याचे समोर येणे हे पक्षासाठी अस्वस्थ करणारे ठरत आहे.
