रुपाली चाकणकरांकडे इतर नेत्यांचे व्हिडिओ:भाजप 'वॉशिंग मशीन'मधून काढून क्लीन चिट देईल, कॉंग्रेसच्या संगीता तिवारींचा आरोप
अशोक खरात प्रकरणामुळे राज्य महिला आयोगाच्या अध्यक्षपदाचा राजीनामा द्याव्या लागलेल्या राष्ट्रवादी काँग्रेसच्या नेत्या रुपाली चाकणकर यांच्यावर आता काँग्रेस कार्यकर्त्या संगीता तिवारी यांनी अत्यंत गंभीर आरोप केले आहेत. चाकणकर यांच्याकडे इतर अनेक नेत्यांचे व्हिडीओ असल्याचा दावा तिवारी यांनी केला असून, हे व्हिडीओ सार्वजनिक होऊ नयेत म्हणूनच त्यांना या प्रकरणात क्लीन चिट देण्याचा प्रयत्न केला जात असल्याचे त्यांनी म्हटले आहे. तसेच, भाजप आता आपल्या वॉशिंग मशीनमध्ये टाकून चाकणकर यांना धुवून काढेल आणि निर्दोष ठरवेल, अशी खोचक टीकाही संगीता तिवारी यांनी केली आहे. संगीता तिवारी म्हणाल्या, रुपाली चाकणकर यांना सुनील तटकरे यांना अजित पवार यांच्या जागी बसवायचे होते, त्यामुळे त्यांनी हे सगळे केले आहे. हेच तटकरे आणि चाकणकर गुवाहाटीला पुजेसाठी गेले होते. रुपाली चाकणकर बाईंकडे इतर नेत्यांचे व्हिडीओ आहेत. त्यामुळे हे व्हिडीओ बाहेर येऊ नये म्हणून या बाईला आता क्लिन चीट देण्याचा प्रयत्न होत आहे. भाजप चाकणकर यांना आपल्या वॉशिंग मशिनमध्ये धुवून काढेल. एकटे रोहित पवार विमान अपघाताबद्दल बोलत आहेत पुढे बोलताना संगीता तिवारी म्हणाल्या, मी अजितदादांसोबत पक्षात होते, पण मी मुळात काँग्रेस पक्षाची कार्यकर्ता आहे, त्यामुळे मी पुन्हा आता काँग्रेसमध्ये आले आहे. त्यामुळे मी आता आमचे जिल्हाध्यक्ष प्रशांत जगताप यांच्या नेतृत्वात काम करत आहे. अजितदादांचा विमान अपघात झाला, त्यानंतर आता पक्षाला कोणी उरले नाही. त्यांच्या विमान अपघातासंदर्भात चौकशी देखील होत नाहीये, त्यांच्या घरातील लोक देखील चौकशीसंदर्भात बोलत नाहीयेत. फक्त एकटे रोहित पवार हे या विमान अपघातासंदर्भात बोलत आहेत. अशोक खरातचा अजितदादांच्या अपघाताशी संबंध अशोक खरातचा अजित पवार यांच्या मृत्यूशी संबध आहे, कारण या खरातच्या बँकेच्या अकाउंटमध्ये पैसे कुठून आले? आणि हे पैसे अजित दादा यांचा विमान अपघात घडण्याच्या आदल्या दिवशी तसेच विमान अपघाताच्या दिवशी आले होते, त्याचा आणि याचा काहीतरी संबंध आहे, आणि याला जबाबदार रुपाली चाकणकर या आहेत, असा गंभीर आरोपही संगीता तिवारी यांनी केला आहे.
