गणपतराव देशमुख यांचे ज्येष्ठ सुपुत्र पोपट देशमुख यांचे निधन:राजकीय वारसा असूनही सादगीने जगले; शांत, संयमी, मनमिळावू व्यक्तिमत्त्व हरपलं

सांगोला विधानसभा मतदारसंघाचे आमदार डॉ. बाबासाहेब देशमुख यांच्या कुटुंबावर दु:खाचा डोंगर कोसळला आहे. ज्येष्ठ नेते आणि विक्रमवीर आमदार स्वर्गीय गणपतराव देशमुख यांचे ज्येष्ठ सुपुत्र पोपट गणपतराव देशमुख यांचे सोमवारी अल्पशा आजाराने निधन झाले. ते 69 वर्षांचे होते. गेल्या काही दिवसांपासून त्यांची प्रकृती खालावली होती. त्यांच्या निधनाची बातमी समोर येताच सांगोला आणि मोहोळ तालुक्यात हळहळ व्यक्त करण्यात येत आहे. सामाजिक क्षेत्रात शांतपणे काम करणारे आणि साधेपणाने जीवन जगणारे व्यक्तिमत्त्व हरपल्याची भावना अनेकांनी व्यक्त केली. पोपट देशमुख हे मोहोळ तालुक्यातील पेनूर गावचे रहिवासी होते. त्यांचे वडील स्वर्गीय गणपतराव देशमुख यांनी महाराष्ट्राच्या राजकारणात मोठा ठसा उमटवला होता. राज्यातील सर्वाधिक काळ आमदार राहण्याचा विक्रम त्यांच्या नावावर आहे. सलग अकरा वेळा विधानसभा निवडणूक जिंकून त्यांनी राज्याच्या राजकारणात वेगळी ओळख निर्माण केली होती. अशा मोठ्या राजकीय परंपरेत वाढूनही पोपट देशमुख यांनी स्वतः मात्र सक्रिय राजकारणापासून कायम अंतर राखले. त्यांनी प्रकाशझोतात राहण्याऐवजी गावात राहून कुटुंब आणि समाजाशी नाळ जोडून ठेवली. राजकीय पद किंवा सत्ता यांची इच्छा न बाळगता त्यांनी साधे आणि संयमी आयुष्य जगणे पसंत केले. परिसरातील लोकांशी त्यांचे अतिशय जिव्हाळ्याचे संबंध होते. शांत स्वभाव, मनमिळावू वृत्ती आणि प्रत्येकाशी आदराने वागण्यामुळे त्यांना गावात आणि तालुक्यात विशेष मान होता. सामाजिक प्रश्नांमध्येही ते नेहमी सक्रिय राहत असत. कुणालाही मदतीची गरज भासल्यास ते तत्परतेने पुढे येत असल्याने परिसरात त्यांच्याबद्दल आदराची भावना होती. आमदार डॉ. बाबासाहेब देशमुख यांच्या राजकीय प्रवासातही पोपट देशमुख यांची मोठी भूमिका असल्याचे मानले जाते. पडद्यामागे राहून त्यांनी कुटुंबाला आणि कार्यकर्त्यांना नेहमीच आधार दिला. बाबासाहेब देशमुख यांना जनतेपर्यंत पोहोचवण्यात आणि त्यांची राजकीय वाट अधिक मजबूत करण्यात त्यांनी महत्त्वाचे योगदान दिले, अशी भावना कार्यकर्त्यांकडून व्यक्त केली जात आहे. त्यामुळे त्यांच्या निधनामुळे देशमुख कुटुंबासोबतच कार्यकर्त्यांमध्येही शोककळा पसरली आहे. मोहोळ तालुक्यातील पेनूर येथे अंत्यसंस्कार पोपट देशमुख यांच्या पश्चात पत्नी, मुलगा आणि मुलगी असा परिवार आहे. त्यांच्या पार्थिवावर मोहोळ तालुक्यातील पेनूर येथे अंत्यसंस्कार करण्यात आले. त्यांच्या निधनानंतर विविध राजकीय, सामाजिक आणि सहकार क्षेत्रातील मान्यवरांकडून श्रद्धांजली अर्पण करण्यात येत आहे. साधेपणा, संयम आणि माणुसकी जपणारे व्यक्तिमत्त्व म्हणून पोपट देशमुख यांची ओळख कायम स्मरणात राहील, अशा भावना अनेकांनी व्यक्त केल्या आहेत.