अंकुरा हॉस्पिटलतर्फे जागतिक पीआयसीयु जनजागृती सप्ताह:गंभीर आजारातून बऱ्या झालेल्या बालरुग्णांचा आणि आरोग्य कर्मचाऱ्यांचा गौरव
पुणे येथील अंकुरा हॉस्पिटल फॉर वुमन अँड चिल्ड्रनने जागतिक पेडिअट्रिक इंटेन्सिव्ह केअर युनिट (पीआयसीयु) जनजागृती सप्ताहानिमित्त एका विशेष कार्यक्रमाचे आयोजन केले होते. “देखभाल करणाऱ्यांची देखभाल घेणे” या संकल्पनेवर आधारित या उपक्रमात गंभीर आजारांवर मात केलेल्या बालरुग्णांचा आणि त्यांना रात्रंदिवस सेवा देणाऱ्या आरोग्य कर्मचाऱ्यांचा सन्मान करण्यात आला. पीआयसीयु मधून यशस्वी उपचार घेऊन बाहेर पडलेल्या मुलांसाठी हा कार्यक्रम एक भावनिक सोहळा ठरला. मृत्यूशी झुंज देऊन पुन्हा हसणाऱ्या या चिमुकल्या लढवय्यांना भेटवस्तू देऊन गौरवण्यात आले. यावेळी मुलांसह त्यांच्या पालकांसाठी विविध मनोरंजक उपक्रम राबवण्यात आले, ज्यामुळे कठीण उपचार काळातून गेलेल्या कुटुंबांना मोठा भावनिक आधार मिळाला. रुग्णांची काळजी घेणारे डॉक्टर्स, परिचारिका आणि कर्मचारी यांच्या समर्पणालाही यावेळी विशेष आदराने गौरवण्यात आले. लहान मुलांच्या गंभीर आजारांवर उपचार करण्यासाठी पीआयसीयु हा विभाग अत्यंत महत्त्वाचा असतो. गंभीर संसर्ग, श्वसनाचे विकार, अपघात, शस्त्रक्रियेनंतरची गुंतागुंत किंवा अवयव निकामी होणे अशा जीवघेण्या परिस्थितीत तज्ज्ञ डॉक्टर आणि प्रशिक्षित कर्मचारी येथे २४ तास कार्यरत असतात. या सप्ताहाचा मुख्य उद्देश बालरुग्णांच्या अतिदक्षता उपचारांबाबत समाजात जागरूकता निर्माण करणे हा आहे. डॉ. मिलिंद जंबगी यांनी यावेळी सांगितले की, पीआयसीयु मध्ये दाखल होणारे प्रत्येक मूल आणि त्यांचे कुटुंब मोठ्या भावनिक ताणातून जात असते. हा सप्ताह केवळ वैद्यकीय सेवेचा गौरव नसून पालक, परिचारिका आणि डॉक्टर यांच्या एकत्रित ताकदीचा सन्मान आहे. ‘तुम्ही एकटे नाही आहात’ हा दिलासा कुटुंबांना देणे हे आमचे कर्तव्य आहे. गंभीर आजारातून बरे होऊन मुलांना पुन्हा खेळताना पाहणे, हीच आमची सर्वात मोठी प्रेरणा आहे. या उपक्रमातून वेळेवर निदान, अत्याधुनिक अतिदक्षता सेवा आणि कुटुंबकेंद्रित आधारव्यवस्थेचे महत्त्व अधोरेखित करण्यात आले. कठीण वैद्यकीय परिस्थितीतून गेलेल्या कुटुंबांना या कार्यक्रमामुळे नवीन उभारी मिळाली असून, त्यांना मानसिक बळ मिळाले आहे.
