बोरीवली आणि कांदिवली स्थानकांचे होणार कायापालट:जनतेच्या सूचनांनुसार अंतिम आराखडा तयार होणार – आमदार संजय उपाध्याय

केंद्रीय रेल्वेमंत्री अश्विनी वैष्णव यांची भेट घेतल्यानंतर बोरीवली आणि कांदिवली रेल्वे स्थानकांच्या पुनर्विकास प्रक्रियेला वेग आला आहे. रेल्वेमंत्र्यांच्या निर्देशानुसार रेल्वेच्या वरिष्ठ अधिकाऱ्यांनी स्थानकांची पाहणी केली असून प्रवाशांच्या सोयी-सुविधांचा विचार करून या महत्त्वाकांक्षी योजनेला अंतिम स्वरूप देण्याची प्रक्रिया सुरू करण्यात आली आहे. ही माहिती बोरीवलीचे भाजप आमदार संजय उपाध्याय यांनी दिली. आमदार संजय उपाध्याय यांनी सांगितले की, केंद्रीय रेल्वेमंत्री अश्विनी वैष्णव यांची भेट घेतल्यानंतर त्यांनी रेल्वे लँड डेव्हलपमेंट ऑथॉरिटी (RLDA) चे उपाध्यक्ष मनोज गर्ग आणि मुंबईचे सीपीएम डी. के. मिश्रा यांना बोरीवली आणि कांदिवली स्थानकांच्या पुनर्विकास आराखड्याला अंतिम स्वरूप देण्याचे निर्देश दिले. या अनुषंगाने आज दोन्ही अधिकाऱ्यांनी बोरीवली स्थानकाची पाहणी करून प्रत्यक्ष परिस्थितीचा आढावा घेतला. त्यानंतर अधिकाऱ्यांसमवेत सविस्तर आढावा बैठक घेण्यात आली. या बैठकीत स्थानकांना आधुनिक आणि प्रवासी-अनुकूल बनविण्यासंदर्भात सखोल चर्चा करण्यात आली. पुनर्विकास आराखड्याची प्रमुख वैशिष्ट्ये संजय उपाध्याय यांनी सांगितले की, प्रवाशांच्या सोयी लक्षात घेऊन या प्रकल्पात काही मुद्द्यांवर विशेष भर देण्यात येत आहे. रेल्वे प्रवाशांचे स्थानकात येणे-जाणे पूर्णपणे सोपे आणि सुलभ करण्यात येणार आहे. स्थानकातून बाहेर पडताना किंवा स्थानकात येताना प्रवाशांना टॅक्सी, रिक्षा तसेच खासगी वाहनांसाठी सुलभ व्यवस्था उपलब्ध करून दिली जाणार आहे. स्थानकांवर पुरेशा तिकीट खिडक्या तसेच स्वच्छ आणि सुसज्ज स्वच्छतागृहांची व्यवस्था करण्यात येणार आहे. प्रवाशांच्या सोयीसाठी सर्व प्लॅटफॉर्मवर एस्केलेटर बसविण्यात येणार आहेत. स्थानक परिसरातील विविध भागांत विखुरलेल्या इमारतींचे एकत्रीकरण करण्यात येणार असून कमी जागेत अधिक आणि दर्जेदार सुविधा उपलब्ध करून दिल्या जाणार आहेत. कांदिवली स्थानक हब म्हणून विकसित होणार बोरीवली स्थानकावरील वाढत्या प्रवासी भार आणि गर्दी कमी करण्यासाठी कांदिवली स्थानकाचा ‘हब’ म्हणून विकास करण्याचा महत्त्वपूर्ण निर्णय घेण्यात आला आहे. यासंदर्भातही अधिकाऱ्यांसमवेत सविस्तर चर्चा करण्यात आली. तसेच, बोरीवली-कांदिवली परिसरातील उपनगरीय नागरिकांना अधिकाधिक सुविधा आणि दिलासा मिळावा यासाठी काही ठिकाणी जमीन अधिग्रहण करण्याचाही सरकार विचार करत असल्याचे त्यांनी सांगितले. जनतेच्या सूचनांनुसार तयार होणार अंतिम आराखडा संजय उपाध्याय यांनी सांगितले की, ही योजना नागरिकांच्या गरजांनुसार तयार करण्यासाठी निश्चित कालमर्यादा ठरविण्यात आली आहे. पुढील दहा दिवसांत या आराखड्यावर सविस्तर काम केले जाणार असून त्यानंतर पुन्हा बैठक घेऊन त्याला अंतिम स्वरूप दिले जाईल. पुढील आठवड्यात बोरीवली स्थानकावर विशेष शिबिर आयोजित करण्यात येणार आहे. या शिबिराद्वारे स्थानिक नागरिक आणि प्रवाशांकडून सूचना आणि अभिप्राय घेतले जाणार आहेत. नागरिकांकडून मिळालेल्या महत्त्वपूर्ण सूचना आणि माहितीचा नव्या स्थानक आराखड्यात समावेश करण्यात येणार असून त्यामुळे स्थानक अधिक सक्षम आणि प्रवासीहिताचे बनविण्यात मदत होणार आहे. रेल्वेमंत्र्यांच्या तत्परतेचे कौतुक संजय उपाध्याय यांनी केंद्रीय रेल्वेमंत्री अश्विनी वैष्णव यांनी दाखविलेल्या तत्परतेचे कौतुक करताना सांगितले की, “भेटीनंतर दुसऱ्याच दिवशी त्यांनी बोरीवली स्थानक पुनर्विकासासंदर्भात बैठक बोलावली आणि अधिकाऱ्यांना आराखडा अंतिम करण्याचे निर्देश दिले. लोकप्रतिनिधी आणि जनतेच्या सूचनांचा समावेश करून सुरू असलेले हे काम खरोखरच कौतुकास्पद आहे.”