SSC 10th Result 2026 | दहावीचा निकाल जाहीर; मुलींनी मारली बाजी, कोणता विभाग राज्यात अव्वल?

SSC 10th Result 2026 | महाराष्ट्र राज्य माध्यमिक व उच्च माध्यमिक शिक्षण मंडळाने (Maharashtra State Board) आज दहावीचा निकाल (SSC Result 2026) अधिकृतपणे घोषित केला आहे. बोर्डाचे अध्यक्ष त्रिगुण कुलकर्णी (Trigun Kulkarni) यांनी पत्रकार परिषदेत दिलेल्या माहितीनुसार, यंदा राज्याचा एकूण निकाल ९२.०९ टक्के लागला असून गेल्या वर्षाच्या तुलनेत निकालात २ टक्क्यांची घट झाली आहे. दुपारी १ ऐवजी आता सकाळी ११:३० वाजल्यापासूनच विद्यार्थ्यांना ऑनलाईन निकाल पाहता येणार आहे.

मुलींचे यश आणि विभागीय आकडेवारी

दहावीच्या निकालात यंदा पुन्हा एकदा मुलींनीच वर्चस्व गाजवले आहे. मुलींच्या उत्तीर्णतेचे प्रमाण ९४.९६ टक्के आहे, तर ९०.५६ टक्के मुले उत्तीर्ण झाली आहेत. एकूण १५ लाख ५५ हजार ०२६ विद्यार्थ्यांनी नोंदणी केली होती, त्यापैकी १४ लाख २० हजार ४८६ विद्यार्थी यशस्वी झाले आहेत.

विभागीय निकालाचा विचार करता कोकण (Konkan) विभाग ९७.६२ टक्क्यांसह राज्यात पहिल्या क्रमांकावर आहे. त्यापाठोपाठ कोल्हापूर (Kolhapur) ९५.४७ टक्के आणि मुंबई (Mumbai) ९४.९७ टक्क्यांसह आघाडीवर आहेत. पुणे (Pune) विभागाचा निकाल ९४.२४ टक्के लागला असून सर्वात कमी निकाल छत्रपती संभाजीनगर (Chhatrapati Sambhajinagar) विभागाचा ८८.४१ टक्के इतका नोंदवण्यात आला आहे.

निकाल पाहण्याची पद्धत आणि संकेतस्थळे

विद्यार्थ्यांना आपला निकाल पाहण्यासाठी महामंडळाने विविध अधिकृत संकेतस्थळे उपलब्ध करून दिली आहेत. निकाल पाहण्यासाठी विद्यार्थ्यांनी https://mahahsscboard.in किंवा https://sscresult.mahahsscboard.in/ या वेबसाइटवर जाऊन आपला परीक्षा क्रमांक (Seat Number) आणि आईच्या नावाचे पहिले अक्षर प्रविष्ट करावे. याव्यतिरिक्त एसएमएसद्वारे निकाल मिळवण्यासाठी ‘MHSSC [Seat Number]’ टाईप करून ५७७६६ या क्रमांकावर पाठवावा.

पुनर्मूल्यांकन आणि उत्तरपत्रिका छायाप्रत

ज्या विद्यार्थ्यांना आपल्या गुणांबाबत शंका आहे, त्यांच्यासाठी गुणपडताळणी आणि उत्तरपत्रिकांच्या छायाप्रतीसाठी ऑनलाईन अर्ज करण्याची सुविधा उपलब्ध करून देण्यात आली आहे. पुनर्मूल्यांकनासाठी (Revaluation) अर्ज करण्यापूर्वी उत्तरपत्रिकेची छायाप्रत घेणे अनिवार्य आहे. छायाप्रत मिळाल्यापासून पाच दिवसांच्या आत विहित शुल्क भरून विद्यार्थ्यांना बोर्डाच्या संकेतस्थळावरून पुनर्मूल्यांकनासाठी मागणी करता येईल.

News Title: SSC 10th Result 2026 Maharashtra Board Declared Today