Supriya Sule | मुंबई-पुणे एक्सप्रेसवेवर भीषण वाहतूक कोंडी; सुप्रिया सुळे 2 तास ट्रॅफिकमध्ये, VIDEO केला शेअर

Supriya Sule | मुंबई-पुणे एक्सप्रेसवेवर (Mumbai-Pune Expressway) आज सकाळपासूनच वाहनांच्या लांबच लांब रांगा लागल्या असून प्रवाशांना प्रचंड मनस्ताप सहन करावा लागला आहे. दोन दिवसांपूर्वी मानखुर्द (Mankhurd) येथे झालेल्या कोंडीनंतर आज पुन्हा घाट परिसरात हजारो वाहने अडकून पडल्याने प्रवासाचा वेळ कित्येक पटींनी वाढला आहे. या वाहतूक कोंडीचा मोठा फटका राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे (Supriya Sule) यांना बसला असून, त्या सुमारे दोन ते तीन तास या ट्रॅफिकमध्ये अडकून पडल्या होत्या.

सण आणि सुट्ट्यांमुळे महामार्गावर वाढलेला ताण

महाराष्ट्र दिनानिमित्त (Maharashtra Day) असणारी सुट्टी आणि जोडून आलेला विकेंड यामुळे पर्यटकांनी मोठ्या संख्येने घराबाहेर पडणे पसंत केल्याने महामार्गावर वाहनांचा प्रचंड दबाव निर्माण झाला आहे. सुप्रिया सुळे सकाळी ७ वाजता ठाणे (Thane) येथून पुण्याच्या दिशेने निघाल्या होत्या, मात्र लोणावळा (Lonavala) घाट परिसरात रस्ता अरुंद असल्याने निर्माण झालेल्या कोंडीमुळे त्यांची गाडी तासनतास एकाच ठिकाणी उभी होती. यामुळे पुण्यात आयोजित करण्यात आलेल्या ध्वजारोहण समारंभाला त्या वेळेत उपस्थित राहू शकल्या नाहीत.

त्यांच्या अनुपस्थितीत पुणे पक्ष कार्यालयातील झेंडावंदनाचा कार्यक्रम माजी खासदार वंदना चव्हाण (Vandana Chavan) यांच्या हस्ते संपन्न झाला. महामार्गावर केवळ १५ मिनिटांचे अंतर पार करण्यासाठी प्रवाशांना ५ ते ६ तास लागत असल्याचे चित्र गेल्या काही दिवसांपासून वारंवार पाहायला मिळत आहे, ज्यामुळे सार्वजनिक वाहतूक व्यवस्थेवर प्रश्नचिन्ह उपस्थित केले जात आहे.

हतबलता व्यक्त करत प्रवाशांशी साधला संवाद

वाहतूक कोंडीत अडकल्यानंतर सुप्रिया सुळे यांनी स्वतः आपल्या मोबाईलवरून तेथील परिस्थितीचे चित्रीकरण केले आणि व्हॉट्सॲप (WhatsApp) स्टेटसच्या माध्यमातून आपली हतबलता व्यक्त केली. त्यांनी शेअर केलेल्या व्हिडिओमध्ये आजूबाजूच्या कारमधील प्रवाशांशी संवाद साधताना त्या दिसत आहेत. यावेळी त्यांनी उपरोधिकपणे “महाराष्ट्र दिन स्पेशल” असे म्हणत प्रवाशांची विचारपूस केली. अंधेरी (Andheri) आणि इतर भागांतून सकाळी लवकर निघालेले नागरिकही अजून घाट माथ्यावरच अडकले असल्याचे या संवादातून समोर आले.

विशेष म्हणजे, आजच मुख्यमंत्री आणि उपमुख्यमंत्र्यांच्या हस्ते ‘मिसिंग लिंक’चे (Missing Link) उद्घाटन नियोजित आहे. या महत्त्वाच्या प्रकल्पाच्या कार्यक्रमामुळे आणि पर्यटकांच्या गर्दीमुळे महामार्गावर सकाळपासूनच वाहनांची वर्दळ वाढली होती. घाटातील अरुंद रस्त्यामुळे वाहनांची गती मंदावली असून वाहतूक सुरळीत करण्यासाठी पोलीस यंत्रणेकडून प्रयत्न केले जात आहेत, तरीही वाहनांच्या रांगा कमी होताना दिसत नाहीत.

News Title: Supriya Sule Stuck in Pune-Mumbai Expressway Traffic video viral