विधानपरिषदेसाठी सुनेत्रा पवारांसमोर मोठं आव्हान:एक जागा, 75 इच्छुक! राष्ट्रवादीत तुफान स्पर्धा; अंतिम निर्णय कुणाच्या बाजूने?

महाराष्ट्रातील विधानपरिषद निवडणुकीच्या पार्श्वभूमीवर राष्ट्रवादी काँग्रेस पक्षात मोठी हालचाल सुरू झाली आहे. पक्षाच्या वाट्याला आलेल्या केवळ एका जागेसाठी 70 ते 75 इच्छुकांनी दावेदारी केल्याने पक्षात प्रचंड चुरस निर्माण झाली आहे. या जागेसाठी कोणाला उमेदवारी द्यायची, याबाबत अंतिम निर्णय घेणे पक्ष नेतृत्वासाठी मोठे आव्हान ठरणार आहे. यासाठी लवकरच कोअर कमिटीची बैठक होणार असून, त्यात सखोल चर्चा अपेक्षित आहे. या संदर्भात पक्षाचे प्रदेशाध्यक्ष सुनील तटकरे यांनी माध्यमांशी बोलताना माहिती दिली की, एका जागेसाठी इतक्या मोठ्या संख्येने इच्छुक पुढे आल्याने निर्णय प्रक्रियेला अधिक गांभीर्य प्राप्त झाले आहे. अजून अंतिम निर्णय झालेला नसला, तरी वरिष्ठ स्तरावर चर्चा सुरू आहे. विविध भागांतील कार्यकर्त्यांची मागणी लक्षात घेऊन योग्य उमेदवाराची निवड केली जाईल, असे त्यांनी स्पष्ट केले. पक्षाच्या बैठकीत काही प्रमुख नावांवर विशेष चर्चा होणार असल्याची माहिती समोर येत आहे. त्यामध्ये विक्रम काकडे, सुरेश बिराजदार, झिशान सिद्दीकी आणि राजेंद्र जैन यांचा समावेश आहे. या चारही नेत्यांचे पक्षातील योगदान, राजकीय पार्श्वभूमी आणि प्रादेशिक प्रभाव लक्षात घेऊन त्यांची दावेदारी मजबूत मानली जात आहे. त्यामुळे या बैठकीत नेमका कोणता चेहरा पुढे येतो, याकडे सर्वांचे लक्ष लागले आहे. विक्रम काकडे हे माजी खासदार संजय काकडे यांचे पुत्र असून त्यांची राजकीय ओळख मजबूत आहे. सुरेश बिराजदार यांनी धाराशिव जिल्ह्यात पक्ष संघटना मजबूत करण्यासाठी काम केले आहे. झिशान सिद्दीकी हे पक्षातील सक्रिय आणि ओळख असलेले नेते असून त्यांनी विधानसभा निवडणूक लढवली होती. तर राजेंद्र जैन हे माजी आमदार असून त्यांना पक्षातील वरिष्ठ नेत्यांचे पाठबळ असल्याचे मानले जाते. त्यामुळे या सर्व नावांमध्ये तीव्र स्पर्धा दिसून येत आहे. या निवडणुकीत विधानसभेतील संख्याबळानुसार भाजपला सर्वाधिक जागा मिळणार असून, त्यानंतर शिवसेना आणि राष्ट्रवादीला जागा वाटप झाले आहे. राष्ट्रवादीच्या वाट्याला केवळ एकच जागा आल्याने पक्षात उमेदवारीसाठी संघर्ष अधिकच तीव्र झाला आहे. प्रत्येक इच्छुक आपल्या स्तरावर प्रयत्न करत असून, राजकीय समीकरणे आणि गटबाजी यांचाही परिणाम या प्रक्रियेवर होण्याची शक्यता आहे. कार्यकर्त्यांच्या अपेक्षा आणि राजकीय गणित यांचा समतोल दरम्यान, सुनेत्रा पवार यांच्या अध्यक्षतेखाली होणारी बैठक निर्णायक ठरणार आहे. या बैठकीत सर्व इच्छुकांच्या नावांचा आढावा घेतला जाईल आणि पक्षासाठी सर्वात योग्य उमेदवार निवडला जाईल. एकीकडे कार्यकर्त्यांच्या अपेक्षा आणि दुसरीकडे राजकीय गणित यांचा समतोल साधत अंतिम निर्णय घेतला जाईल. त्यामुळे आता राष्ट्रवादी काँग्रेसकडून कोणाला संधी मिळते, याकडे संपूर्ण राज्याचे लक्ष लागले आहे.