Riteish-Genelia Deshmukh | ST साठी मोठा निर्णय! रितेश-जिनिलिया ‘लालपरी’चे नवे ब्रॅण्ड अॅम्बेसिडर
Riteish-Genelia Deshmukh | महाराष्ट्राची जीवनवाहिनी समजल्या जाणाऱ्या राज्य परिवहन महामंडळाने (MSRTC) आपली प्रतिमा अधिक उजळ करण्यासाठी एक मोठा निर्णय घेतला आहे. लोकप्रिय मराठी अभिनेता रितेश देशमुख (Riteish Deshmukh) आणि त्याची पत्नी अभिनेत्री जेनेलिया देशमुख (Genelia Deshmukh) यांची एसटीचे नवीन ब्रँड अॅम्बेसेडर म्हणून निवड करण्यात आली आहे. आधुनिक काळातील प्रवाशांना सार्वजनिक वाहतुकीकडे वळवण्यासाठी आणि एसटीच्या सेवेबद्दल विश्वासार्हता वाढवण्यासाठी या लाडक्या जोडीची मदत घेतली जाणार आहे.
पाच वर्षांच्या कराराद्वारे नवी जाहिरात मोहीम
एसटी महामंडळ आणि देशमुख दाम्पत्य यांच्यात पुढील पाच वर्षांसाठी हा महत्त्वपूर्ण करार करण्यात येणार आहे. परिवहन मंत्री प्रताप सरनाईक (Pratap Sarnaik) हे लवकरच यासंदर्भातील अधिकृत घोषणा करून करारावर स्वाक्षरी करतील. या पाच वर्षांच्या कालावधीत रितेश आणि जेनेलिया एसटीच्या विविध व्यावसायिक जाहिराती, प्रवासी जनजागृती मोहिमा आणि महामंडळाच्या सामाजिक उपक्रमांचे प्रमुख चेहरे असतील.
ग्रामीण भागासह शहरी तरुण पिढीला एसटीच्या प्रवासासाठी आकर्षित करणे, हा या निवडीमागचा मुख्य हेतू आहे. ही जोडी केवळ पडद्यावरच नाही तर खऱ्या आयुष्यातही महाराष्ट्रात अत्यंत लोकप्रिय असल्याने, त्यांच्या माध्यमातून एसटीचा प्रचार तळागाळापर्यंत पोहोचवणे सोपे होईल, असा विश्वास प्रशासनाने व्यक्त केला आहे.
मराठी कलाकारांचा वारसा आता नव्या पिढीकडे
एसटी महामंडळाने यापूर्वीही अनेक दिग्गज मराठी कलाकारांच्या लोकप्रियतेचा उपयोग करून घेतला आहे. याआधी ज्येष्ठ अभिनेते मकरंद अनासपुरे (Makarand Anaspure) आणि दिवंगत विक्रम गोखले (Vikram Gokhale) यांनी एसटीचे ब्रँड अॅम्बेसेडर म्हणून जबाबदारी पार पाडली होती. त्यांच्या साध्या आणि प्रभावी संवादशैलीमुळे एसटीला ग्रामीण भागात मोठी पसंती मिळाली होती.
आता रितेश आणि जेनेलिया यांच्या निवडीमुळे एसटी महामंडळ सोशल मीडिया आणि डिजिटल युगात आपल्या सेवेचा विस्तार करू पाहत आहे. सोशल मीडियावर या दोन्ही कलाकारांचा मोठा चाहता वर्ग असल्याने एसटीच्या नव्या योजना आणि सुविधांची माहिती तरुण वर्गापर्यंत प्रभावीपणे पोहोचू शकेल. लवकरच ही जोडी ‘लालपरी’च्या विविध प्रचार मोहिमांमध्ये सक्रियपणे सहभागी होताना दिसून येईल.
News Title: Riteish Genelia Deshmukh appointed MSRTC Brand Ambassadors
