Mumbai Water Cut | मुंबईकरांनो, पाणी जपून वापरा! २० एप्रिलपासून सलग ७ दिवस ‘या’ भागांत पाणीकपात होणार

Mumbai Water Cut | मुंबईकरांसाठी महत्त्वाची बातमी समोर आली आहे. बृहन्मुंबई महानगरपालिका (BMC) ने शहरातील काही भागांत 5 टक्के पाणी कपात लागू करण्याचा निर्णय घेतला आहे. ही कपात सलग सात दिवस राहणार असून 20 एप्रिल 2026 पासून तिची अंमलबजावणी सुरू होणार आहे. त्यामुळे नागरिकांनी आधीच पाण्याचे योग्य नियोजन करण्याचे आवाहन प्रशासनाने केले आहे.

मुंबईत आधीच पाणीटंचाईची चर्चा सुरू असताना या नव्या निर्णयामुळे काही भागातील नागरिकांना अडचणींचा सामना करावा लागू शकतो. मात्र, ही कपात तात्पुरती असून आवश्यक देखभाल कामांसाठीच केली जात असल्याचे पालिकेकडून स्पष्ट करण्यात आले आहे.

मुंबईतील पाणीपुरवठा सुरळीत ठेवण्यासाठी जलबोगद्यांचे नियमित देखभाल कार्य अत्यंत महत्त्वाचे असते. याच पार्श्वभूमीवर अमर महल ते वडाळा आणि पुढे परळपर्यंत असलेल्या जलबोगदा क्रमांक 1 तसेच अमर महल ते ट्रॉम्बेपर्यंतच्या जलबोगदा क्रमांक 2 वर काम करण्यात येणार आहे. या कामांत भरण (चार्जिंग), धुलाई (फ्लशिंग), क्लोरीनीकरण आणि डी-क्लोरीनीकरण अशा प्रक्रिया केल्या जाणार आहेत. (Mumbai Water Cut News)

ही कामे 20 एप्रिल ते 27 एप्रिल 2026 या कालावधीत पार पडणार आहेत. या दरम्यान पाणीपुरवठा पूर्णपणे बंद न करता फक्त 5 टक्के कपात करण्यात येणार आहे, जेणेकरून नागरिकांना कमी त्रास होईल.

Mumbai Water Cut | ‘या’ भागांवर होणार परिणाम :

या पाणी कपातीचा परिणाम मुंबईतील अनेक विभागांवर होणार आहे. विशेषतः एल (कुर्ला पूर्व), एम पूर्व, एम पश्चिम, एन, एस, टी तसेच शहरातील ए, बी, सी, ई, एफ उत्तर आणि एफ दक्षिण या विभागांमध्ये पाणीपुरवठा कमी होणार आहे. त्यामुळे या भागांतील नागरिकांनी खबरदारी घेणे आवश्यक आहे.

पालिकेने नागरिकांना पाण्याचा जपून वापर करण्याचे आणि आवश्यक तेवढाच साठा करून ठेवण्याचे आवाहन केले आहे. आठवडाभर चालणाऱ्या या कपातीदरम्यान पाण्याचा अपव्यय टाळणे अत्यंत गरजेचे असल्याचेही प्रशासनाने सांगितले आहे.