निकाल लागून 6 महिने उलटले तरी 'नीट-एसएस' कॉउन्सिलिंग रखडलेलीच:एचआरडीएची मेडिकल कॉन्सिलिंग कमिटीकडे पत्राद्वारे मागणी

नीट सुपर स्पेशालिटी (नीट-एसएस) परीक्षेचा निकाल लागून सहा महिन्यांहून अधिक काळ लोटला असला तरी, कॉउन्सिलिंग प्रक्रिया अजूनही रखडलेली आहे. या प्रशासकीय दिरंगाईमुळे देशातील हजारो पात्र डॉक्टरांचे भवितव्य अनिश्चिततेत सापडले आहे. हेल्थकेअर रिफॉर्म्स डॉक्टर्स असोसिएशन (एचआरडीए) ने ही प्रक्रिया तात्काळ पूर्ण करण्याची मागणी केली आहे. या संदर्भात, असोसिएशनने मेडिकल कॉन्सिलिंग कमिटी (एमसीसी) च्या अध्यक्षांना थेट पत्र पाठवून डॉक्टरांच्या हक्कांचे रक्षण करण्याची विनंती केली आहे. सर्वोच्च न्यायालयाने विवादित सुपर स्पेशालिटी जागांबाबत निर्देश दिल्यानंतरही कॉउन्सिलिंग प्रक्रिया का रखडली आहे, याबाबत प्रशासनाकडून कोणतेही स्पष्टीकरण देण्यात आलेले नाही. या अनिश्चिततेमुळे पात्र उमेदवारांना तीव्र मानसिक ताण आणि चिंतेचा सामना करावा लागत आहे. दीर्घकाळ बेरोजगार राहिल्याने त्यांच्यावर आर्थिक संकट ओढवले आहे. महत्त्वाचे म्हणजे, सुपर स्पेशालिटी प्रशिक्षण वेळेत सुरू न झाल्याने देशाच्या आरोग्य व्यवस्थेला मिळणाऱ्या तज्ज्ञ डॉक्टरांच्या सेवांनाही विलंब होत आहे. एचआरडीएने आपल्या पत्रात काही प्रमुख मागण्या केल्या आहेत. सर्वोच्च न्यायालयाच्या निर्देशांचे काटेकोर पालन करून ‘नीट-एसएस’ कॉउन्सिलिंग प्रक्रिया तातडीने पूर्ण करावी, अशी त्यांची मागणी आहे. तसेच, पहिल्या फेरीत जागा मिळालेल्या उमेदवारांना त्यांच्या संस्थांमध्ये रुजू होण्याची परवानगी द्यावी आणि पुढील फेऱ्यांमध्ये भाग घेण्याचा व अपग्रेडेशन मिळवण्याचा त्यांचा हक्क अबाधित ठेवावा, जेणेकरून उमेदवारांचे नुकसान होणार नाही. प्रशासकीय विलंबाचा फटका उमेदवारांच्या करिअरच्या संधींवर आणि त्यांच्या वैध अपेक्षांवर पडू नये याची काळजी घ्यावी, असेही असोसिएशनने म्हटले आहे. एचआरडीएचे अध्यक्ष डॉ. कार्तिक नागुला यांनी आवाहन केले आहे की, हजारो तरुण डॉक्टरांचे भविष्य अशा प्रकारे अनिश्चिततेत ठेवता येणार नाही. त्यामुळे केंद्रीय आरोग्य मंत्रालय आणि कॉउन्सिलिंग कमिटीने या विषयाचे गांभीर्य ओळखून त्वरित पावले उचलावीत. या पत्राची प्रत केंद्रीय आरोग्य मंत्री, आरोग्य सचिव आणि राष्ट्रीय वैद्यकीय आयोग यांच्याकडेही पुढील कार्यवाहीसाठी पाठवण्यात आली आहे.