सिंबायोसिसतर्फे 'सिमहेलथ 2026' परिषदेचे आयोजन:देश-विदेशातील तज्ज्ञ आरोग्य क्षेत्रातील बदलांवर चर्चा करणार
सिंबायोसिस आंतरराष्ट्रीय (अभिमत विद्यापीठ) तर्फे ‘सिमहेलथ २०२६’ परिषदेचे आयोजन करण्यात आले आहे. आरोग्य क्षेत्रातील नवनवीन संशोधन, तंत्रज्ञान आणि भविष्यातील आव्हानांवर या परिषदेत मंथन होणार आहे. सिंबायोसिसच्या वैद्यकीय व आरोग्य विज्ञान विद्याशाखेचे प्रोव्होस्ट डॉ. राजीव येरवडेकर यांनी पत्रकार परिषदेत ही माहिती दिली. या परिषदेला महाराष्ट्र मेडिकल कौन्सिलची अधिकृत मान्यता मिळाली आहे. यामुळे परिषदेत सहभागी होणाऱ्या डॉक्टरांना त्यांच्या व्यावसायिक प्रगतीसाठी आवश्यक क्रेडिट पॉइंट्स मिळतील. वैद्यकीय शिक्षणात सातत्य राखण्यासाठी आणि ज्ञानाचे नूतनीकरण करण्यासाठी हे एक महत्त्वाचे व्यासपीठ ठरेल, असे डॉ. येरवडेकर यांनी सांगितले. डिजिटल इंडियाच्या संकल्पनेला प्रोत्साहन देण्यासाठी, परिषदेतील सर्व प्रतिनिधींना ‘ई-भागीदारी प्रमाणपत्र’ दिले जाईल. यामुळे कागदाचा वापर कमी होऊन प्रक्रिया अधिक सुलभ व वेगवान होईल. आधुनिक तंत्रज्ञानाचा वापर करून ही परिषद अधिक सर्वसमावेशक करण्याचा विद्यापीठाचा मानस आहे. सिंबायोसिस विद्यापीठ आरोग्य शिक्षण आणि सेवेमध्ये नेहमीच नवनवीन प्रयोग करत आले आहे. ‘सिमहेलथ २०२६’ मध्ये सिम्युलेशन तंत्रज्ञान, टेलिमेडिसिन आणि कृत्रिम बुद्धिमत्ता यांसारख्या विषयांवर विशेष सत्रे आयोजित केली जातील. ही परिषद केवळ पुण्यापुरती मर्यादित न राहता राष्ट्रीय आणि आंतरराष्ट्रीय स्तरावर एक नवा आदर्श निर्माण करेल, असे डॉ. येरवडेकर यांनी नमूद केले.
वार्ताहार/प्रतिनिधी
