अमरावती भूमी अभिलेखला अत्याधुनिक उपकरणे मिळाली:महसूलमंत्री चंद्रशेखर बावनकुळेंच्या हस्ते वितरण, कामाचा वेग वाढणार

अमरावती येथील भूमी अभिलेख कार्यालयाला आता अत्याधुनिक उपकरणे मिळाली आहेत, ज्यामुळे कामकाजाचा वेग वाढणार आहे. भूमी अभिलेख विभागामार्फत भूमापन दिनानिमित्त आयोजित कार्यक्रमात राज्याचे महसूल मंत्री तथा जिल्ह्याचे पालकमंत्री चंद्रशेखर बावनकुळे यांच्या हस्ते या उपकरणांचे वितरण करण्यात आले. हा कार्यक्रम जिल्हाधिकारी कार्यालयात पार पडला. यावेळी जिल्हाधिकारी आशिष येरेकर आणि भूमिअभिलेख विभागाचे जिल्हा अधीक्षक महेशकुमार शिंदे यांच्यासह आमदार सुलभाताई खोडके, राजेश वानखडे, प्रवीण तायडे, केवलराम काळे, महापौर श्रीचंद तेजवानी, माजी पालकमंत्री प्रवीण पोटे असे अनेक मान्यवर उपस्थित होते. पालकमंत्री बावनकुळे यांनी भूमापन मोजणीचा कालावधी ९० दिवसांवरून तसेच द्रुतगती मोजणीचा कालावधी एका महिन्यावरून १५ दिवसांवर आणण्याचे निर्देश दिले. यासाठीच नवीन मोजणी साहित्य आणि यंत्रसामुग्री उपलब्ध करून देण्यात आल्याचे त्यांनी सांगितले. जिल्ह्यात या कामासाठी मनुष्यबळ कमी पडत असल्यास जिल्हास्तरीय समितीमार्फत मनुष्यबळाची भरती करावी, असेही बावनकुळे म्हणाले. नगर भूमापनाचे काम ‘भू-नक्शा’ या प्रकल्पाखाली सुरू आहे. हा प्रकल्प प्रायोगिक तत्त्वावर राज्यात दहा ठिकाणी सुरू करण्यात आला असून, त्यात अमरावतीचाही समावेश आहे. याच कार्यक्रमात जिल्हाधिकारी कार्यालयाने खरेदी केलेल्या पाच नवीन वाहनांचे वितरणही पालकमंत्री चंद्रशेखर बावनकुळे यांच्या हस्ते हिरवी झेंडी दाखवून करण्यात आले. चांदूर रेल्वे, चांदूर बाजार, अंजनगाव सुर्जी, दर्यापूर आणि वरूड येथील तहसीलदारांना ही वाहने देण्यात आली. जुनी वाहने निर्लेखित करण्याची प्रक्रिया सुरू असल्याने या ठिकाणी नव्या वाहनांची गरज होती.