सांगोल्यात भाजपच्या पदाधिकाऱ्याची निर्घृण हत्या:शिवसेना शिंदे गटाच्या नेत्यावर आरोप; 7 दिवसानंतरही तपास न झाल्याने कुटुंबीयांचा संताप

ठाण्यातील प्रदीप पूर्णेकर हत्या प्रकरणावरून राजकारण तापलेले असतानाच, आता सांगोल्यामध्ये भाजपा युवा मोर्चाचे माजी तालुकाध्यक्ष प्रतापसिंह करचे यांची गोळ्या झाडून निर्घृण हत्या झाल्याने मोठी खळबळ उडाली आहे. या हत्या प्रकरणात शिंदे गटाच्या शिवसेनेच्या नेत्यावर कट रचल्याचा आरोप झाल्यामुळे राजकीय वर्तुळात पुन्हा एकदा खळबळ माजली आहे. एकीकडे ठाण्यातील घटनेमुळे शिंदे गट अडचणीत असताना, आता सांगोल्यातील या नव्या घटनेने शिवसेनेच्या नेत्यांना पुन्हा एकदा निशाण्यावर आणले आहे. ही धक्कादायक घटना 27 ऑक्टोबरच्या मध्यरात्री 2 वाजण्याच्या सुमारास सांगोला तालुक्यातील तिप्पेहळ्ळी परिसरात घडली. प्रतापसिंह करचे आपल्या चारचाकी गाडीतून प्रवास करत असताना त्यांच्यासोबत असलेल्या हर्षवर्धन ऐवळे आणि विक्रम घरडे या संशयित आरोपींनी त्यांच्यावर गोळ्या झाडल्या. या प्रकरणी सांगोला पोलीस ठाण्यात हत्येचा गुन्हा दाखल करण्यात आला असून, पोलिसांनी दोन्ही आरोपींना अटक केली आहे. मात्र, या हत्येमागे राजकीय कट असल्याचा खळबळजनक आरोप करचे यांच्या कुटुंबाने केला आहे. शिंदे गटाच्या नेत्यांवर सुपारी दिल्याचा आरोप या हत्येमागे आटपाडी येथील शिंदे गटाचे नेते आणि सांगली जिल्हा मध्यवर्ती सहकारी बँकेचे संचालक तानाजी पाटील, त्यांचे बंधू शिवाजी पाटील आणि जिल्हा परिषद सदस्य रोहन पाटील यांनी कट रचून सुपारी दिल्याचा गंभीर आरोप मयत प्रतापसिंह यांच्या पत्नी अर्चना करचे यांनी केला आहे. या संदर्भात करचे कुटुंबीयांनी सोलापूरच्या जिल्हा पोलीस अधीक्षकांकडे लेखी तक्रारही दिली आहे. पत्नीचा संतप्त सवाल आपल्या पतीच्या हत्येबद्दल बोलताना अर्चना करचे यांनी तीव्र संताप व्यक्त केला. “माझे पती प्रताप सिंह करचे हे भाजपचे युवा मोर्चा तालुक्याचे अध्यक्ष होते. त्यांचा रात्रीच्या दोन वाजता गोळ्या घालून हत्या केली. भाजप सरकार असून सुद्धा माझ्या पतीला अजून न्याय मिळाला नाही. शिवसेना शिंदे गटाकडून तानाजी पाटील, शिवाजी पाटील आणि रोहन पाटील यांच्याकडून माझ्या पतीची हत्या झाली म्हणजे पाठीमागचे ते सूत्रधार आहेत. शिंदे साहेब म्हणजे देवेंद्र फडणवीस साहेबांचे सरकार असून माझे पती भाजपसाठी म्हणजे युवा मोर्चाचे अध्यक्ष तालुका अध्यक्ष होते. तरी आपलं सरकार असून सुद्धा त्यांना न्याय मिळाला नाही. आमची मागणी एवढीच आहे की जी मागचे सूत्रधार आहेत शिवाजी पाटील, तानाजी पाटील, रोहन पाटील त्यांनी ज्यांना सुपारी दिली त्यांना शिक्षा व्हावी. अन्यथा आम्ही पोलीस स्टेशनच्या बाहेर उपोषण करू नाहीतर आत्मदहन करू. ही माझी देवेंद्र फडणवीसांना विनंती आहे. मला दोन मुलं आहेत. एक माझा सात वर्षाचा मुलगा आहे आणि एक तीन वर्षाचा मुलगा आहे. आमचा घरातला कर्ता पुरुषच गेला. ही फडणवीस साहेबांना विनंती आहे त्यांनी लवकरत लवकर म्हणजे आरोपींना अटक करावी.” बंधूंचा ऑडिओ रेकॉर्डिंगचा दावा प्रतापसिंह यांचे भाऊ अजितसिंह करचे यांनी या प्रकरणात एक ऑडिओ रेकॉर्डिंग सापडल्याचा दावा केला आहे. “माझ्या भावाचा खून झाला. 27 तारखेला मध्यरात्री. आम्ही पोलीस स्टेशनला गेल्यानंतर आम्हाला रेकॉर्डिंग सापडलं. रेकॉर्डिंगमध्ये आटपाडीचे तानाजी पाटील यांचे बंधू शिवाजी पाटील, रोहन पाटील. यांचे रेकॉर्डिंग सापडले. रेकॉर्डिंगमध्ये सरळ सरळ त्यांनी उल्लेख केला, तुझा बंदोबस्त करतो. आणि पोलीस स्टेशन काही त्यांना आरोपी करणार त्यांना जोपर्यंत आरोपी करत नाही तोपर्यंत आम्ही पोलीस स्टेशन समोर उपोषणाला बसणार आहे 7 तारखेपासून. हे शिवसेना शिंदे गटाचे मोठे नेते आहेत. त्यांचे. त्यांनी घडवून आणले सगळं. सुपारी देऊन घडवून आणले त्यांनी. राजकीय दबाव आहे आर्थिक दबाव आहे.” दोन आरोपींना अटक या हत्ये प्रकरणी पोलिसांनी त्वरित कारवाई करत दोन आरोपींना अटक केली आहे आणि त्यांच्याकडून हत्येत वापरलेले पिस्तूलही जप्त केले आहे. सध्या हे दोन्ही आरोपी पोलीस कोठडीत असून, त्यांच्याकडून अधिक माहिती मिळवण्याचा प्रयत्न पोलीस करत आहेत. पोलिसांची भूमिका आणि तपास या प्रकरणावर माहिती देताना पोलीस निरीक्षक राहुल देशपांडे म्हणाले, “या घटनेमध्ये पोलीस स्टेशनला 1043/2026 अशा प्रमाणे गुन्हा दाखल करण्यात आलेला आहे. त्याच्यामध्ये मयत आहे प्रतापसिंह उर्फ गब्बर ज्ञानू करचे. हा सांगोल्यावरून त्याच्या गावी किडी बिसरीला जात होता, त्यावेळेस ती पिंपळी गावाच्या जवळीक कॅनोलवरती पूल आहे, त्या पुलावरती त्याच्याच मित्रांनी पाठीमागून त्याच्या डोक्यात गोळ्या घातलेल्या आहेत आणि त्याच्यामध्ये उपचारादरम्यान त्याचा मृत्यू झालेला आहे. या घटनेमध्ये त्याच्या पत्नीच्या तक्रारीवरून पोलीस स्टेशनला गुन्हा दाखल आहे. गुन्ह्यामध्ये दोन आरोपी अटक आहेत. त्याच्यामध्ये बालाजी उर्फ हर्षवर्धन नामदेव ऐवळे आणि दुसरा आहे विकी उर्फ विक्रांत शिवाजी घिरडे दोघेही केडी बिसरीचे आहेत. त्याच्या संपर्कात त्या दोघांना आम्ही अटक केलेले आहे आणि त्याची पीसीआर घेतलेली आहे. त्याच्यात जे गुन्ह्यात वापरलेलं शस्त्र होतं ते शस्त्र जप्त केलेलं आहे. बाकी इतर बराचसा तपास पूर्ण झालेला आहे. यामध्ये जे जे डिजिटल पुरावे आहेत त्याच्यामध्ये आणखीन कोणाचा सहभाग आहे का, किंवा शस्त्र त्याला कोणी पुरवलं आहे. जे आम्हाला तपासाच्या दृष्टीने करणे आवश्यक आहे ते आम्ही पूर्ण तांत्रिक पुरावे गोळा करून त्याच्यामध्ये तपास सुरू आहे. कोणालाही पाठीशी घातल जाणार नाही आणि अनावश्यक ज्यांचा या गुन्ह्यामध्ये सहभाग नाही त्यांनाही अनावश्यकपणे बोलू दिलं जाणार नाही.” मास्टरमाईंडचा शोध सुरू या घटनेत प्रत्यक्ष गोळ्या झाडणाऱ्या आरोपींना पकडण्यात आले असले तरी या मागचे नेमके कारण आणि मास्टरमाईंड कोण याचा शोध अद्याप सुरू आहे. डिजिटल पुरावे आणि तांत्रिक विश्लेषणाच्या आधारे पोलीस या प्रकरणाच्या मुळापर्यंत पोहोचण्याचा प्रयत्न करत आहेत.