सुशील कराडवर विनयभंगाचा गुन्हा दाखल:महिलेचे गंभीर आरोप, परळी पोलिसांवर विश्वास नसून वरिष्ठ अधिकाऱ्यांकडून चौकशीची मागणी

बीड जिल्ह्यातील मस्साजोग गावचे सरपंच संतोष देशमुख यांच्या हत्या प्रकरणात सध्या कारागृहात असलेल्या वाल्मीक कराड याचा मुलगा सुशील कराड याच्या अडचणीत मोठी वाढ झाली आहे. सुशील कराडवर एका महिलेच्या घरात घुसून बंदुकीचा धाक दाखवत जीवे मारण्याची धमकी देणे, विनयभंग करणे आणि ‘पोक्सो’ कायद्यांतर्गत गंभीर स्वरूपाचा गुन्हा दाखल करण्यात आला आहे. या प्रकरणी पीडित महिलेने परळी पोलिसांच्या तपासावर तीव्र अविश्वास व्यक्त केला आहे. परळी पोलिसांवर आमचा अजिबात विश्वास नसून, या गुन्ह्याची वरिष्ठ अधिकाऱ्यांमार्फत चौकशी व्हावी आणि हा तपास सोलापूर पोलिसांकडे सोपवावा, अशी थेट मागणी पीडितेने राज्याचे मुख्यमंत्री देवेंद्र फडणवीस यांच्याकडे माध्यमांशी बोलताना केली आहे. संपत्ती हडपल्याचा आणि छळाचा आरोप पीडितेने आपल्या व्यथा मांडताना सांगितले की, आमचा प्रचंड छळ करण्यात आला असून माझ्या पतीला जबर मारहाण करण्यात आली आहे. आमच्या गाड्या ओढून नेण्यात आल्या आणि आमचे फ्लॅट देखील बळकावले आहेत. विशेष म्हणजे, या संपूर्ण प्रकरणात विजयकुमार ससाने आणि सचिन सानप हे पोलिस कर्मचारीही सहभागी असल्याचा गंभीर आरोप करत, या प्रकरणाचा तपास सोलापूरच्या एमआयडीसी पोलिसांकडूनच व्हावा, असा आग्रह महिलेने धरला आहे. वाल्मीक कराडचे खोटे आश्वासन झालेल्या मारहाणीत पीडितेच्या पतीच्या कानाचा पडदा फाटला होता. त्यावेळी या कुटुंबाने वाल्मिक कराडची भेट घेतली होती. तेव्हा वाल्मीकने, “तुम्ही आधी ऑपरेशन करून घ्या, परत आल्यावर मी तुम्हाला सगळं परत देतो आणि सुशीललाही समजून सांगतो,” असे आश्वासन दिले होते. मात्र, आजवर त्यांना त्यांचे काहीही परत मिळालेले नाही. राजकीय दबावामुळे कारवाईस टाळाटाळ या सततच्या त्रासाविरोधात 2024 मध्येच तक्रार देऊनही राजकीय दबावामुळे कोणतीही कारवाई झाली नसल्याचे पीडितेचे म्हणणे आहे. सोलापूर एमआयडीसी पोलिस ठाण्यात आणि सोलापूर पोलिस आयुक्तालयात तक्रार करूनही कोणताही प्रतिसाद न मिळाल्याने अखेर त्यांना न्यायालयात जावे लागले. सुशील कराड आणि त्याच्या साथीदारांनी थेट सोलापुरात येऊन आपल्याला मारहाण केली आणि फोनवर शिवीगाळ केल्याचा आरोपही या महिलेने केला आहे.