डफरीन अग्निकांड:आमदार चित्रा वाघ यांची सदोष मनुष्यवधाचा गुन्हा दाखल करण्याची मागणी, मुख्यमंत्र्यांची घेणार भेट

[ads1]

अमरावती येथील डफरीन रुग्णालयातील अग्निकांड प्रकरणी भाजप नेत्या आमदार चित्रा वाघ यांनी पोलीस चौकशीची मागणी केली आहे. संबंधित अधिकाऱ्यांकडून मिळत असलेली माहिती अस्पष्ट आणि परस्परविरोधी असल्याने त्यांनी ही मागणी केली. घटनेच्या सहाव्या दिवशी, शनिवार, २९ ऑगस्ट रोजी आमदार वाघ यांनी डफरीन रुग्णालयाला भेट दिली, त्यावेळी त्यांनी ही मागणी केली. सत्ताधाऱ्यांकडून आलेली ही पहिलीच मागणी आहे. माध्यमांशी बोलण्यापूर्वी आमदार चित्रा वाघ यांनी जिल्हाधिकारी आशिष येरेकर आणि जिल्हा स्त्री रुग्णालयाचे अधीक्षक डॉ. विनोद पवार यांच्याशी स्वतंत्रपणे चर्चा केली. त्यानंतर त्यांनी सांगितले की, या मागणीसाठी भाजपचे शिष्टमंडळ थेट मुख्यमंत्री देवेंद्र फडणवीस यांची भेट घेणार आहे. त्यांच्या निरीक्षणानुसार, रुग्णालयाचे स्ट्रक्चरल, फायर आणि इलेक्ट्रिकल ऑडिट वेळेत पूर्ण होणे आवश्यक होते. इमारत नवीन असल्याने स्ट्रक्चरल ऑडिटचा मुद्दा लागू होत नसला तरी, उर्वरित दोन ऑडिटची गरज होती. मात्र, यासंदर्भात उपलब्ध माहितीमध्ये मोठा विरोधाभास आहे. फायर ऑडिट वेळेत व्हावे यासाठी डॉ. पवार यांनी २५ जून रोजी सार्वजनिक बांधकाम विभागाला (PWD) पत्र दिले होते. त्यानंतरही वारंवार पत्रव्यवहार करूनही विभागाने सहकार्य केले नाही, असे डॉ. पवार यांचे म्हणणे आहे. याउलट, पीडब्ल्यूडीचे कार्यकारी अभियंता (विद्युत विभाग) सागर शेंडे यांच्या मते, त्यांच्या पत्राला प्रतिसाद देत ३० जून रोजी पाहणी करण्यात आली आणि २२ ऑगस्ट रोजी प्रत्यक्ष कामाला सुरुवात झाली. डॉ. पवार यांनी मात्र हे काम झालेच नाही आणि कोणीही आले नाही, असे म्हटले आहे. तर, पीडब्ल्यूडीने काम केल्यानंतर सानप नावाच्या कर्मचाऱ्याकडून तशी नोंद करून घेतल्याचा दावा केला आहे. जिल्हाधिकारी आशिष येरेकर यांच्यासमोरच हा संपूर्ण दूरध्वनी संवाद झाल्याचे सांगण्यात आले. आमदार वाघ यांच्या मते, हे संपूर्ण प्रकरण गुंतागुंतीचे असून पोलीस चौकशीतूनच सत्य समोर येईल. पोलीस चौकशीअंती दोषी निश्चित झाल्यावर संबंधितांविरुद्ध सदोष मनुष्यवधाचा गुन्हा दाखल केला जाईल, असेही त्यांनी नमूद केले. यावेळी खासदार डॉ. अनिल बोंडे, आमदार प्रताप अडसड, प्रवक्ते शिवराय कुळकर्णी, महापौर श्रीचंद तेजवानी, मनपाचे सभागृह नेते चेतन पवार आदी उपस्थित होते.

[ads2]