भोंदूबाबा अशोक खरातला कोर्टाचा दणका; न्यायालयीन कोठडी:उद्या पुन्हा हजेरीचे आदेश; SIT पुन्हा ताबा घेणार, तपासाला वेग
नाशिकमध्ये गाजत असलेल्या भोंदूबाबा प्रकरणात आरोपी अशोक खरात याच्याविरोधातील कारवाई अधिक तीव्र होताना दिसत आहे. आज नाशिक जिल्हा सत्र न्यायालयात झालेल्या सुनावणीत न्यायालयाने त्याला न्यायालयीन कोठडी सुनावली. यासोबतच आरोपीला उद्या पुन्हा न्यायालयात हजर करण्याचे स्पष्ट आदेश देण्यात आले. त्यामुळे या प्रकरणात पुढील काही दिवसांत आणखी महत्त्वाच्या घडामोडी घडण्याची शक्यता व्यक्त केली जात आहे. यापूर्वीच्या सुनावणीत न्यायालयाने अशोक खरातला 8 एप्रिलपर्यंत पोलिस कोठडी दिली होती. ती मुदत संपल्यानंतर आज त्याला पुन्हा न्यायालयासमोर हजर करण्यात आले. सुरक्षेच्या कारणास्तव या वेळीही त्याला प्रत्यक्ष न्यायालयात न आणता व्हिडीओ कॉन्फरन्सिंगद्वारेच हजर करण्यात आले. सुनावणीदरम्यान न्यायालयाने त्याची ओळख पटवण्यासाठी थेट त्याचे नाव विचारले. त्यानंतर दुसऱ्या गुन्ह्यात त्याला न्यायालयीन कोठडी देण्याचा निर्णय घेतला गेला. आजच्या सुनावणीत अनेक महत्त्वाचे अधिकारी आणि वकील उपस्थित होते. आरोपीचे वकील सचिन भाटे न्यायालयात हजर होते, तर सरकारी बाजू मांडण्यासाठी शैलेंद्र बागडे उपस्थित होते. या प्रकरणाचे तपास अधिकारी किरण कुमार सूर्यवंशी यांनीही न्यायालयात हजेरी लावली. सुनावणीदरम्यान पुढील गुन्ह्यांमध्ये आरोपीचा ताबा मिळावा यासाठी अर्ज करण्यात येणार असल्याचेही स्पष्ट करण्यात आले. न्यायालयीन कोठडी मिळाल्यानंतर अशोक खरातला आता मध्यवर्ती कारागृहात दाखल केले जाणार आहे. त्यानंतर विशेष तपास पथक (SIT) त्याचा पुन्हा ताबा घेण्याची प्रक्रिया राबवणार असल्याची माहिती समोर आली आहे. या संपूर्ण प्रक्रियेसाठी आवश्यक कायदेशीर औपचारिकता आजच पूर्ण करण्यात येणार असल्याचेही सांगण्यात आले. त्यामुळे तपास अधिक वेगाने पुढे जाणार असल्याचे संकेत मिळत आहेत. गंभीर स्वरूप पाहता न्यायालयीन प्रक्रियेला वेग सुनावणीनंतर सरकारी वकील शैलेंद्र बागडे यांनी माध्यमांशी बोलताना महत्त्वाची माहिती दिली. त्यांनी सांगितले की, आरोपीविरोधात दुसऱ्या गुन्ह्यात न्यायालयीन कोठडी मिळाली असून तिसऱ्या गुन्ह्यात ताबा घेण्याचा अर्जही मंजूर झाला आहे. त्यामुळे उद्या पुन्हा अशोक खरातला न्यायालयात हजर करण्यात येणार आहे. या प्रकरणातील गंभीर स्वरूप पाहता न्यायालयीन प्रक्रियेला वेग आला असून पुढील सुनावणीकडे सर्वांचे लक्ष लागले आहे.
वार्ताहार/प्रतिनिधी
