पळशीमध्ये लातुर गुन्हे शाखेच्या् पथकावर हल्ला:सहाय्यक पोलिस निरीक्षकासह 6 कर्मचारी जखमी, घरफोडीतील आरोपीच्या अटकेसाठी आले होते पथक

वसमत तालुक्यातील पळशी येथे घरफोडीच्या गुन्ह्यात आरोपीच्या अटकेसाठी आलेल्या लातूर पोलिस दलातील स्थानिक गुन्हे शाखेच्या पथकावर जमावाने हल्ला गेला. यामध्ये सहाय्यक पोलिस निरीक्षकासह सहा जण जखमी झाले आहेत. या प्रकरणी 9 जणांवर हट्टा पोलिस ठाण्यात सरकारी कामात अडथळा आणल्याच्या आरोपावरून गुरुवारी ता. 29 पहाटे गुन्हा दाखल झाला आहे. आरोपींच्या शोधासाठी पोलिसांची तीन पथके रवाना झाली आहेत. पोलिसांनी दिले्ल्या माहितीनुसार, लातूर जिल्ह्यातील एका घरफोडीच्या गुन्ह्यात वसमत तालुक्यातील पळशी येथील एका आरोपीचा सहभाग असल्याची माहिती लातूरच्या स्थानिक गुन्हे शाखेच्या पथकाला मिळाली होती. त्यावरून स्थानिक गुन्हे शाखेचे सहाय्यक पोलिस निरीक्षक पांडूरंग माने यांच्यासह सहा कर्मचारी आरोपीच्या अटकेसाठी आज पहाटे दोन वाजण्याच्या सुमारास पळशी येथे आले होते. दरम्यान,लातूरचे पोलिस आल्याचे लक्षात येताच त्या ठिकाणी असलेल्या 9 जणांनी पोलिसांवर हल्ला चढविला. पोलिसांना काही कळण्याच्या आतच त्यांना लाकडाचा दांडा व लोखंडी रॉडने मारहाण सुरु झाली. या मारहाणीत सहाय्यक पोलिस निरीक्षक पांडूरंग माने यांच्यासह कर्मचारी जखमी झाले. या मारहाणी नंतर 9 जण घटनास्थळावरून फरार झाले. या घटनेची माहिती हट्टा पोलिसांना मिळाल्यानंतर सहाय्यक पोलिस निरीक्षक ज्ञानेश्‍वर बसवंते, जमादार कृष्णा चव्हाण, अविनाश राठोड, शिवा पतंगे, संदीप चव्हाण, गणेश सुर्यवंशी, भारशंकर यांनी घटनास्थळी धाव घेतली. पोलिसांनी जखमी लातूर पोलिसांना तातडीने उपचारासाठी हट्टा प्राथमिक आरोग्य केंद्रात दाखल केले. त्या ठिकाणी प्राथमिक उपचार केल्यानंतर पोलिसांचे पथक लातूरचा रवाना झाले. या प्रकरणी हट्टा पोलिसांनी सुदर्शन शिंदे, राजू शिंदे, विकी शिंदे, सचिन शिंदे यांच्यासह अन्य पाच जणांवर सरकारी कामात अडथळा आणल्याच्या आरोपावरुन गुन्हा दाखल केला आहे. या आरोपींच्या शोधासाठी हिंगोली पोलिसांची तीन पथके रवाना झाली आहेत.