सरकारचा शिधा बंद, शिवसेनेचा सुरू; नाशिकला शिंदे यांच्या हस्ते वाटप:आखाड्यांना शिवसेनेतर्फे कुंभपर्वात माेफत भाेजनाची घाेषणा

महायुती सरकारचा महत्त्वाकांक्षी प्रकल्प ठरलेला ‘आनंदाचा शिधा’ यंदा दुष्काळी स्थितीचे कारण देऊन बंद करण्यात आला आहे. शिवसेनेचे मुख्य नेते आणि उपमुख्यमंत्री एकनाथ शिंदे यांच्या प्रमुख उपस्थितीत नाशिक जिल्ह्यातील हरसूलमध्ये पक्षातर्फे आनंदाचा शिधावाटप अभियानाचा प्रारंभ करण्यात आला. शिवसेनेतर्फे अशी दिवाळी सणासाठी लागणारी अडीच लाख पाकिटे दुष्काळग्रस्त शेतकऱ्यांना देण्यात येणार आहेत. या वेळी शिवसेना तुमच्या पाठीशी आहे, कठोर निर्णय घेऊ नका, असे आवाहन शिंदे यांनी केले. मात्र या वेळी व्यासपीठावरील बॅनरवर आणि पक्षातर्फे वितरित करण्यात आलेल्या पाकिटांवर ‘आनंदाचा शिधा’ हे सरकारी नावच वापरण्यात आले आहे. याच वेळी शिंदे यांनी नाशिकमध्ये सिंहस्थ आढावा बैठक न घेता फक्त दुष्काळाचाच आढावा घेत भाजपला शह दिल्याची चर्चा रंगली आहे. सिंहस्थ बैठक रद्द; त्याऐवजी दुष्काळाची आढावा बैठक गेल्या आठवड्यात मुख्यमंत्र्यांनी राज्यस्तरीय सरपंच परिषदेत शिंदेंना डावलल्याची कुजबूज होती. या पार्श्वभूमीवर ध्वजारोहणापूर्वी शिंदेंनी नाशिकचा दौरा केला. सर्व १३ आखाड्यांना सिंहस्थ पर्वकाळात १८ महिने शिंदे सेनेतर्फे मोफत भोजनाची घोषणा केली. मात्र नाशिकमध्ये सिंहस्थ आढावा बैठक टाळत दुष्काळाचा अजेंडा घेतला.