अरुणाचलमध्ये सरकारी कार्यालये, पोलिस ठाणी पेटवली:धरणाच्या विरोधात हजारो लोक रस्त्यावर, भाजप प्रदेशाध्यक्षांच्या घरातही लूटमार

[ads1]

अरुणाचल प्रदेशातील ईस्ट सियांग जिल्ह्याजवळील पासीघाट येथे प्रस्तावित ११,२०० मेगावॅटच्या सियांग अपर मल्टीपर्पज प्रकल्पाविरोधात (SUMP) सुरू असलेले आंदोलन शुक्रवारी अचानक हिंसक झाले. स्वतःला ‘जेन झी’ (Gen Z) म्हणवणाऱ्या शेकडो आंदोलकांनी अनेक सरकारी कार्यालये, दोन पोलीस ठाणी आणि ८ पोलीस वाहनांची तोडफोड करून त्यांना आग लावली. भाजपचे प्रदेशाध्यक्ष कलिंग मोयोंग, मारियांग-गेकूचे आमदार ओनी पनयांग आणि माजी केंद्रीय मंत्री व पासीघाट पश्चिमचे आमदार निनोंग एरिंग यांच्या घरांचीही तोडफोड करण्यात आली. दगडफेकीत डीएसपीसह अनेक पोलीस कर्मचारी जखमी झाले. आंदोलनकर्त्यांमध्ये बहुतांश तरुण होते. आमदार एरिंग यांच्या म्हणण्यानुसार, मध्यरात्री २ वाजता ३००-४०० तरुण आंदोलनकर्ते त्यांच्या घरात घुसले. त्यांनी तोडफोड करून मालमत्ता लुटली. आंदोलन आणि हिंसाचाराची तीन छायाचित्रे… जमावाची दगडफेक, पोलिसांनी फोडल्या अश्रुधुराच्या नळकांड्या पोलिसांच्या माहितीनुसार, शुक्रवारी सियांग, अप्पर सियांग आणि पूर्व सियांग जिल्ह्यांत १२ तासांचा बंद पुकारण्यात आला होता. बंद संपल्यानंतर रात्री ११ वाजता हिंसाचार भडकला. तत्पूर्वी बंददरम्यान सियांग जिल्ह्यात १५० ते २०० आंदोलकांनी बॅरिकेड्स तोडण्याचा आणि वाहनांची तोडफोड करण्याचा प्रयत्न केला. आदि समुदायाच्या प्रमुख संघटनेच्या कार्यालयाचीही तोडफोड करण्यात आली. हे लोक शस्त्रे, काठ्या आणि गोफणींनी सज्ज होते. जमावाने पोलिसांवर दगडफेक केली. त्यानंतर सुरक्षा दलांना अश्रुधुराच्या नळकांड्या सोडाव्या लागल्या. आंदोलकांचा आरोप आहे की, शांततेत आंदोलन करणाऱ्या तरुणांवर अश्रुधूर आणि लाठीमार करण्यात आला. त्यानंतर संतापाचा उद्रेक झाला. चीनकडून येणारे पाणी रोखणार धरण, पण लोकांना गावे बुडण्याची चिंता सियांग जिल्ह्यात सियांग नदीवर 11,200 मेगावॅट क्षमतेचा सियांग अपर मल्टीपर्पज प्रोजेक्ट (USMP) प्रस्तावित आहे. चीनकडून येणारे पाणी नियंत्रित करणे आणि पुराचा धोका कमी करणे हा यामागचा उद्देश आहे. सियांग नदी तिबेटमधून येते. अरुणाचल प्रदेशात ती सियांग नदी, तर आसाममध्ये ब्रह्मपुत्रा नदीचा भाग बनते. चीन तिबेटमध्ये या नदीवर ६०,००० मेगावॅट क्षमतेचा प्रकल्प उभारत आहे. भारताची चिंता आहे की चीनच्या धरणामुळे नदीच्या पाण्याच्या प्रवाहात बदल होऊ शकतो किंवा अचानक मोठ्या प्रमाणात पाणी सोडले जाण्याचा धोका निर्माण होऊ शकतो. एप्रिल २०२२ मध्ये जलशक्ती मंत्रालयाने एनएचपीसीला प्राथमिक व्यवहार्यता अहवाल तयार करण्यास सांगितले होते. २०२५ मध्ये तांत्रिक सर्वेक्षणाच्या प्रयत्नांना विरोध होऊ लागला. आदी समुदाय सियांग नदीला माता मानतो. सियांग इंडिजिनस फार्मर्स फोरमचा दावा आहे की या प्रकल्पामुळे २७ गावे पाण्याखाली जाऊ शकतात आणि डझनभर गावांवर परिणाम होऊ शकतो. स्थानिक लोकांच्या संमतीशिवाय सर्वेक्षण पुढे नेले जात आहे.

[ads2]