पुणे विद्यापीठात महात्मा फुले यांच्या विचारांवर राष्ट्रीय कार्यशाळा:राष्ट्रीय पुस्तक न्यास, समर्थ युवा फाऊंडेशन आणि राष्ट्रीय सेवा योजना विभागाचा संयुक्त उपक्रम

महात्मा जोतीराव फुले यांचे समतावादी विचार, सामाजिक न्यायाचे तत्त्वज्ञान आणि शिक्षणविषयक दृष्टिकोन आजच्या तरुणाईपर्यंत पोहोचविण्यासाठी सावित्रीबाई फुले पुणे विद्यापीठात शनिवारपासून (२४ ऑक्टोबर) तीन दिवसीय निवासी राष्ट्रीय कार्यशाळेचे आयोजन करण्यात आले आहे. ‘महात्मा फुले आणि आजची तरुणाई’ हा या कार्यशाळेचा विषय असून, राष्ट्रीय पुस्तक न्यास (एनबीटी), समर्थ युवा फाऊंडेशन आणि विद्यापीठाचा राष्ट्रीय सेवा योजना विभाग यांच्या संयुक्त विद्यमाने हा उपक्रम राबविण्यात येत आहे. कार्यशाळेचा उद्घाटन समारंभ शनिवारी सकाळी १० वाजता होणार आहे. राज्याचे बहुजन कल्याण, दुग्धविकास, अपारंपरिक ऊर्जा आणि दिव्यांग कल्याण मंत्री अतुल सावे यांच्या हस्ते उद्घाटन होईल. उच्च व तंत्रशिक्षण मंत्री चंद्रकांत पाटील प्रमुख पाहुणे म्हणून उपस्थित राहणार आहेत. विद्यापीठाचे कुलगुरू डॉ. सुरेश गोसावी, प्र-कुलगुरू डॉ. पराग काळकर आणि कुलसचिव डॉ. प्रफुल्ल पवार यांची प्रमुख उपस्थिती असेल, अशी माहिती राष्ट्रीय पुस्तक न्यासाचे विश्वस्त राजेश पांडे यांनी दिली. महात्मा फुले यांनी शिक्षणाचा प्रसार, स्त्री-पुरुष समानता, सामाजिक समता, शेतकरीहित आणि वंचितांच्या हक्कांसाठी केलेले कार्य आजही महत्त्वाचे आहे. त्यांच्या विचारांचा समकालीन संदर्भात अभ्यास करून ते युवकांच्या जीवनाशी, सामाजिक जाणिवांशी आणि राष्ट्रनिर्मितीच्या प्रक्रियेशी जोडण्याचा प्रयत्न कार्यशाळेत केला जाणार आहे. युवकांमध्ये वाचनाची आवड, वैचारिक प्रगल्भता आणि महापुरुषांच्या विचारांचा चिकित्सक अभ्यास करण्याची वृत्ती विकसित करण्यावरही भर दिला जाणार आहे. सामाजिक समता, बंधुता, वैज्ञानिक दृष्टिकोन आणि लोकशाही मूल्यांविषयीची जाणीव दृढ करणे हा कार्यशाळेचा प्रमुख उद्देश आहे. महात्मा फुले यांच्या विचारांचा समकालीन संदर्भात अभ्यास करण्याची संधी विद्यार्थ्यांसह संशोधक आणि अभ्यासकांना मिळणार असल्याने अधिकाधिक जणांनी कार्यशाळेत सहभागी व्हावे, असे आवाहन राजेश पांडे यांनी केले आहे.