बारावी पेपरफुटी प्रकरणी ट्यूशन क्लास संचालकासह दोघांना अटक:साध्या वेशातील पोलिसांनी संवेदनशीलतेने तपास केला

बारावीच्या परीक्षेतील पेपरफुटी प्रकरणी ट्यूशन क्लास चालवणाऱ्या संचालकासह दोघांना अटक करण्यात आली आहे. सदर येथील सेंट उर्सुला शाळेत रसायनशास्त्राच्या परीक्षेदरम्यान हा प्रकार उघडकीस आला होता. या घटनेमुळे राज्यभरात खळबळ उडाली आहे. अटक करण्यात आलेल्या आरोपींमध्ये निशिकांत मून (४५, रा. मानकापूर) आणि फरहान अख्तर (२०, रा. कामगारनगर) यांचा समावेश आहे. निशिकांत मून हा शिकवणी वर्ग चालवतो, तर फरहान तिथे शिक्षक म्हणून काम करत होता. दोघांनाही न्यायालयात हजर केले असता, त्यांना चार दिवसांची पोलिस कोठडी सुनावण्यात आली आहे. गुरुवारी रसायनशास्त्राच्या परीक्षेदरम्यान एका विद्यार्थिनीवर संशय आला. ती वारंवार प्रसाधनगृहात जात असल्याने पर्यवेक्षकाने तिची झडती घेतली असता, तिच्याकडे स्मार्टफोन सापडला. या फोनमध्ये परीक्षा सुरू होण्यापूर्वीच १५ सदस्यांच्या व्हॉट्सअॅप ग्रुपमध्ये प्रश्नपत्रिका आणि त्याची उत्तरे शेअर केल्याचे समोर आले. याच केंद्रातील आणखी एक विद्यार्थीही या ग्रुपचा सदस्य होता. घटनेची माहिती मिळताच पोलीस निरीक्षक अमोल देशमुख यांच्या पथकाने तात्काळ घटनास्थळी धाव घेतली. सुरुवातीला शाळेच्या व्यवस्थापनाने संस्थेची प्रतिष्ठा आणि विद्यार्थ्यांच्या भवितव्याची चिंता व्यक्त करत गुन्हा दाखल करण्यास टाळाटाळ केली. मात्र, पोलिसांनी हे प्रकरण गांभीर्याने घेतले आणि परीक्षा मंडळाच्या अध्यक्षांनी प्रकरणाची पुष्टी केल्यानंतर गुन्हा नोंदवण्यात आला. प्राथमिक तपासात शिक्षण विभागातील काही व्यक्तींच्या संगनमताने प्रश्नपत्रिका फुटल्याचा संशय व्यक्त होत आहे. सूत्रांनुसार, प्रति विद्यार्थी २५,००० रुपयांपर्यंत पैसे वसूल केल्याचे वृत्त आहे. नागपूर विभागात बारावीची परीक्षा देणाऱ्या विद्यार्थ्यांची मोठी संख्या पाहता, या घोटाळ्याची व्याप्ती वाढण्याची शक्यता आहे. तपासात मोठ्या प्रमाणात पैशाचे व्यवहार उघड होण्याची शक्यता आहे. परीक्षा केंद्रावर अल्पवयीन विद्यार्थी उपस्थित असल्याने, त्यांच्यात भीतीचे वातावरण निर्माण होऊ नये यासाठी पोलिसांनी साध्या वेशात तपास केला. सध्या या प्रकरणाचा सखोल तपास सुरू असून, या पेपरफुटी नेटवर्कशी संबंधित इतर संभाव्य दुवे शोधले जात आहेत.