अमरावतीचे खासदार बळवंत वानखडे यांच्या मध्यस्थीनंतर तिवसा पोलीस स्टेशनच्या कार्यप्रणालीविरोधात सुरू असलेले उपोषण चौथ्या दिवशी मागे घेण्यात आले. ज्येष्ठ नागरिक दिगांबरराव इंगोले यांनी पुकारलेले हे बेमुदत उपोषण होते. खासदार वानखडे यांनी उपोषणकर्ते दिगांबरराव इंगोले आणि पोलीस प्रशासनाशी चर्चा केली. प्रशासकीय पातळीवर योग्य तोडगा काढण्याचे आश्वासन दिल्यानंतर इंगोले यांनी आपला लढा मागे घेण्याचा निर्णय घेतला. यानंतर खासदारांच्या हस्ते दिगांबरराव इंगोले यांना फळाचा रस देऊन उपोषण यशस्वीरित्या सोडवण्यात आले. सामान्य माणसाच्या अन्यायाविरुद्ध लोकप्रतिनिधी म्हणून खासदारांनी दाखवलेल्या या तत्परतेचे तिवसा तालुक्यात कौतुक होत आहे. यावेळी तिवसा पोलीस निरीक्षक गोपाल उपाध्याय, काँग्रेसचे तालुकाध्यक्ष वैभव वानखडे, तसेच सुरेश मेटकर, किशोर दिवे, सेतू देशमुख, अतुल गवड, सुनील बाखडे, योगेश वानखडे, अमर वानखडे, विश्वजीत बाखडे, प्रणव गौरखेडे, संजय चौधरी, देविदास गायकवाड, गौरव चौधरी, आकाश मकेश्वर, अमन सोनोने, यश करडे आदी उपस्थित होते.
खासदारांच्या मध्यस्थीने पोलिसांविरुद्धचे उपोषण संपले:ज्येष्ठ नागरिकाचा लढा चौथ्या दिवशी मागे
