तेलंगणात महात्मा फुले पुतळ्याची विटंबना:पुण्यात माळी महासंघाचे तीव्र निषेध आंदोलन

तेलंगणा राज्यातील संगारेड्डी जिल्ह्यातील तेल्लापूर गावात क्रांतीसूर्य महात्मा जोतिबा फुले यांच्या पुतळ्याची विटंबना करण्यात आली. या घटनेच्या निषेधार्थ पुणे शहरात माळी महासंघाच्या वतीने जिल्हाधिकारी कार्यालयासमोर तीव्र आंदोलन करण्यात आले. यावेळी माळी समाज बांधव आणि फुले प्रेमी मोठ्या संख्येने उपस्थित होते. आंदोलनात माळी महासंघ पुणे शहर अध्यक्ष दीपक जगताप, महिला अध्यक्ष स्मिता लडकत, नाना कुदळे, बाळासाहेब लडकत, सोमनाथ बटवाल, यशोधन आखाडे, चांगदेव पिंगळे, शशिकला ढोले पाटील, राजेंद्र लडकत, प्रज्वल बनकर, रीमाताई लडकत, गिरीश झगडे, रवी सहाणे, प्रतिभा झगडे, विजय कोठावळे, अभिजीत भुजबळ, शांताताई नेवसे, मारुती भुजबळ, सारंग राऊत आणि गणेश वाडकर यांच्यासह अनेक समाजबांधव व फुले प्रेमी सहभागी झाले होते. आंदोलकांनी ही घटना अत्यंत निंदनीय असल्याचे म्हटले. समाजकंटकांनी केलेल्या या हीन कृत्याचा आणि त्यात सहभागी असलेल्यांचा तीव्र निषेध करण्यात आला. यावेळी, ही केवळ महात्मा फुले यांच्या पुतळ्याची विटंबना नसून, त्यांच्या सामाजिक विचारांवर आणि समतेच्या मूल्यांवर केलेला हल्ला असल्याचे मत व्यक्त करण्यात आले. माळी महासंघाने व्यक्त केला निषेध माळी महासंघ पुणे शहर अध्यक्ष दीपक जगताप यांनी यावेळी बोलताना सांगितले की, महात्मा फुले यांनी पुणे शहरातून शिक्षणाची मुहूर्तमेढ रोवली आणि ज्ञानज्योती सावित्रीबाई फुले यांनी महिला शिक्षणासाठी मोठे योगदान दिले. अशा महान व्यक्तिमत्त्वाच्या पुतळ्याची विटंबना करणाऱ्यांचा आम्ही निषेध करतो. जगताप यांनी पुढे बोलताना इशारा दिला की, जर तेलंगणा सरकार आणि पोलिसांनी या समाजकंटकांवर त्वरित कारवाई केली नाही, तर याविरोधात आणखी तीव्र आंदोलन छेडण्यात येईल.