बनावट शेअर्स ट्रेडिंगने 22 कोटींची फसवणूक:पुणे सायबर पोलिसांनी चार आरोपींना केली अटक

पुणे सायबर पोलिसांनी बनावट शेअर्स ट्रेडिंगद्वारे २२ कोटींहून अधिक रुपयांची फसवणूक करणाऱ्या टोळीतील चार जणांना अटक केली आहे. अंबरनाथ (ठाणे) आणि छत्रपती संभाजीनगर येथून ही कारवाई करण्यात आली. पुण्यातील एका ८५ वर्षीय ज्येष्ठ नागरिकाची २२ कोटी ३ लाख २२ हजार ७४२ रुपयांची ऑनलाईन फसवणूक झाली होती. या प्रकरणी पुणे शहर सायबर पोलीस स्टेशनमध्ये गुन्हा दाखल करण्यात आला आहे. भारतीय न्याय संहिता २०२३ च्या कलम ३१६(५), ३१९(२), ३१८(४), ३(५) आणि माहिती तंत्रज्ञान अधिनियम कलम ६६(ड) अंतर्गत हा गुन्हा नोंदवण्यात आला आहे. फिर्यादी ज्येष्ठ नागरिकाला २७ नोव्हेंबर २०२५ ते ९ जानेवारी २०२६ या काळात शेअर मार्केटमध्ये मोठ्या नफ्याचे आमिष दाखवण्यात आले होते. आरोपींनी त्यांचा विश्वास जिंकून त्यांना व्हॉट्सॲप ग्रुपमध्ये सामील केले आणि एक बनावट लिंक डाउनलोड करण्यास सांगितले. या बनावट ॲप्लिकेशनच्या माध्यमातून शेअर ट्रेडिंगसाठी वेगवेगळ्या १९ बँक खात्यांमध्ये पैसे भरण्यास भाग पाडले. मात्र, गुंतवणूक केलेल्या रकमेपैकी कोणताही परतावा किंवा मूळ रक्कम न देता त्यांची आर्थिक फसवणूक करण्यात आली. तपासादरम्यान तांत्रिक विश्लेषणातून फसवणुकीची रक्कम अनेक बँक खात्यांमध्ये वर्ग झाल्याचे समोर आले. ही खाती मुनिलकुमार सुरेंद्र सिंह (वय ५१, रा. अंबरनाथ), आकाश चंद्रशेखर मराठे (वय २७), लाला केशव उमाप (वय २६) आणि परमेश्वर दिलीप दाभाडे (वय २३, सर्व रा. छत्रपती संभाजीनगर) यांच्या नावावर होती. सायबर पोलिसांच्या दोन स्वतंत्र पथकांनी अंबरनाथ आणि छत्रपती संभाजीनगर येथे कारवाई करत चारही आरोपींना ताब्यात घेतले. त्यांना न्यायालयात हजर केले असता, १२ फेब्रुवारी २०२६ पर्यंत पोलीस कोठडी सुनावण्यात आली आहे. ही कारवाई पोलीस आयुक्त अमितेशकुमार, सह आयुक्त रंजनकुमार शर्मा, अपर आयुक्त पंकज देशमुख आणि उप-आयुक्त विवेक मासाळ यांच्या मार्गदर्शनाखाली वरिष्ठ पोलीस निरीक्षक स्वप्नाली शिंदे व त्यांच्या पथकाने यशस्वी केली.