[ads1]
गुजरातमधील सुरतच्या अलथाण सोसायटीमध्ये एका व्यक्तीने क्षुल्लक कारणावरून ९ वर्षांच्या मुलाला निर्दयीपणे मारहाण केली. थप्पडांमुळे मुलगा जमिनीवर कोसळला. त्यानंतरही आरोपीने त्याला अनेक थप्पड मारल्या, त्यामुळे मुलाच्या कानाला गंभीर दुखापत झाली. मुलाच्या आईने आरोपीविरुद्ध गुन्हा दाखल केला आहे. सायन्स कॉलेजमधील प्राध्यापिका जागृतीबेन सोनालिया यांनी दाखल केलेल्या तक्रारीनुसार, शुक्रवारी संध्याकाळी सुमारे ७ वाजता त्यांचा ९ वर्षांचा मुलगा हितार्थ इमारतीच्या किड्स झोनमध्ये इतर मुलांसोबत खेळत होता. त्याचदरम्यान त्याचा स्माइली बॉल इमारतीत राहणारे वर्धन शाह यांच्या मुलीला लागला. याच गोष्टीवरून संतापलेल्या वर्धनने मुलाला शिवीगाळ करत त्याला ५-६ थप्पड मारल्या. थप्पडांमुळे हितार्थ फरशीवर कोसळला. मुलाने कान पकडून माफी मागितली, मात्र आरोपीने पुन्हा त्याला दोन-तीन थप्पड मारल्या. रात्री मुलाची प्रकृती बिघडली जागृतीबेन यांनी पुढे सांगितले की, तो घरी आला तेव्हा हुंदके देत रडत होता. त्याचे गाल सुजलेले होते आणि भीतीमुळे तो थरथरत होता. इतर मुलांना विचारले असता त्यांनी घटनेबद्दल सांगितले. त्यानंतर कुटुंबीयांनी इमारतीतील सीसीटीव्ही फुटेज तपासले. त्यामध्ये किड्स झोनसमोर लावलेल्या कॅमेऱ्यात ही घटना कैद झाल्याचे दिसून आले. दरम्यान, रात्री मुलाची प्रकृती खालावली. सकाळी त्याला रुग्णालयात दाखल करण्यात आले. यानंतर आरोपीविरुद्ध गुन्हा दाखल करण्यात आला. अलथान पोलिसांनी आरोपीविरुद्ध भारतीय दंड संहिता (बीएनएस) २०२३ मधील कलम ११५(२) आणि अत्याचार प्रतिबंधक अधिनियम १९८९ मधील कलम ३(१)(आर) अंतर्गत गुन्हा दाखल केला आहे. प्रकरणाचे गांभीर्य लक्षात घेऊन पुढील तपास एच डिव्हिजनचे एसीपी झेड.आर. देसाई यांच्याकडे सोपवण्यात आला आहे.
[ads2]
