बँकांचा संप:पाच दिवसांच्या आठवड्याच्या मागणीसाठी कर्मचाऱ्यांनी पुकारले आंदोलन

बँक कर्मचाऱ्यांसाठी पाच दिवसांचा आठवडा असावा, या मागणीसाठी ऑल इंडिया बँक एम्प्लॉईज असोसिएशनने (AIBEA) मंगळवारी देशव्यापी संप पुकारला. सरकारकडून या मागणीची पूर्तता होत नसल्याने हा निर्णय घेण्यात आला. छत्रपती संभाजी नगरमधील पंजाब नॅशनल बँकेसमोर सर्व बँक कर्मचारी संघटनांच्या वतीने आंदोलन करण्यात आले, ज्यात हजारो कर्मचारी सहभागी झाले होते. यावेळी ऑल इंडिया बँक एम्प्लॉईज असोसिएशनचे (AIBEA) नेते देविदास तुळजापूरकर यांनी माहिती दिली की, गेल्या अनेक वर्षांपासून बँक कर्मचारी संघटनांकडून पाच दिवसांच्या आठवड्याची मागणी केली जात आहे. यासंदर्भात करारावर सह्या झाल्यानंतर लवकरच अंमलबजावणी केली जाईल, असे आश्वासन सरकारने दिले होते. तत्कालीन वित्त सचिवांनीही ही मागणी मान्य केली होती. मात्र, अद्याप याबाबत कोणताही निर्णय झालेला नाही, त्यामुळे देशभरातील बँकांनी संप पुकारला आहे. तुळजापूरकर यांनी पुढे सांगितले की, आजचा संप किती तीव्र करायचा, वाढवायचा की बेमुदत करायचा, याचा निर्णय वरिष्ठ पातळीवर घेतला जाईल. तसेच, आगामी अर्थसंकल्पात बँकांच्या विरोधात काही धोरणे आल्यास, त्याविरोधातही तीव्र आंदोलन करण्याचा इशारा बँक कर्मचारी संघटनांनी दिला आहे. या आंदोलनात बँक कर्मचारी संघटनांचे अनेक नेते, अधिकारी आणि कर्मचारी मोठ्या संख्येने उपस्थित होते. यावेळी देविदास तुळजापूरकर, राजेंद्र देवळे यांच्यासह विविध नेत्यांनी कर्मचाऱ्यांना मार्गदर्शन करत भाषणे दिली.