रसदीपसिंह चावला लायन्स क्लब मिडटाऊनचे अध्यक्ष:'मेडिकल पार्क' प्रकल्पाला सर्वोच्च प्राधान्य देणार

लायन्स क्लब ऑफ छत्रपती संभाजीनगर मिडटाऊनच्या लायनिस्टिक वर्ष २०२६-२७ चा पदग्रहण सोहळा आणि नवीन सदस्यांचा दीक्षा समारंभ १० जुलै रोजी उत्साहात पार पडला. या समारंभात लायन रसदीपसिंह चावला यांनी अध्यक्षपदाची, लायन डॉ. विक्रांत भाले यांनी सचिवपदाची, तर लायन दीपक मुंदडा यांनी कोषाध्यक्षपदाची शपथ घेतली. पदग्रहण अधिकारी म्हणून पीएमसीसी पीएमजेएफ लायन गिरीशजी मालपानी यांनी अध्यक्ष, सचिव, कोषाध्यक्ष आणि संचालक मंडळातील पदाधिकाऱ्यांना पद व गोपनीयतेची शपथ दिली. या कार्यक्रमाला पीआयडी लायन नवलजी मालू, द्वितीय उपजिल्हा राज्यपाल लायन सुनीता मालपानी, लायन राजेश राहुट तसेच माजी अध्यक्षा व विभागाध्यक्ष लायन सुनीता देसरडा यांची प्रमुख उपस्थिती होती. लायन राजेश राहुट यांनी सदस्य दीक्षा अधिकारी म्हणून नव्या सदस्यांना लायन्स चळवळीची शपथ देत त्यांचे स्वागत केले. यावेळी मार्गदर्शन करताना लायन गिरीशजी मालपानी यांनी लायनिझम ही केवळ संस्था नसून समाजसेवा, नेतृत्व आणि सामाजिक बांधिलकी जोपासणारी चळवळ असल्याचे सांगितले. स्वतःवर विश्वास ठेवून प्रामाणिकपणे काम केल्यास यश निश्चित मिळते, असेही ते म्हणाले. पीआयडी लायन नवलजी मालू यांनी सेवा, संघटन आणि एकतेच्या बळावर समाजहिताची कार्ये अधिक प्रभावीपणे राबविण्याचे आवाहन केले. अध्यक्षीय भाषणात लायन रसदीपसिंह चावला यांनी यंदाच्या वर्षात “प्रत्येक हृदयात सेवेचा दीप प्रज्वलित करूया” या संकल्पनेअंतर्गत विविध समाजोपयोगी उपक्रम राबविण्याची घोषणा केली. त्यांनी क्लबच्या महत्त्वाकांक्षी ‘लँडमार्क हेल्थकेअर अँड असिस्टेड लिव्हिंग’ (मेडिकल पार्क) प्रकल्पाला सर्वोच्च प्राधान्य देण्यात येणार असल्याचे सांगितले. मिडटाऊन लायन्स सर्व्हिसेस ट्रस्टचे अध्यक्ष लायन शेखरजी देसरडा यांच्या नेतृत्वाखाली उभारण्यात येणाऱ्या सुमारे ४० कोटी रुपयांच्या या प्रकल्पामध्ये १४३ खाटांचे बहुविशेषज्ञ रुग्णालय, २४ तास आपत्कालीन सेवा, १२ खाटांचे डायलिसिस केंद्र, तीन अत्याधुनिक शस्त्रक्रिया कक्ष, १० खाटांचा अतिदक्षता विभाग (आयसीयू), मूत्रपिंड प्रत्यारोपणासाठी एचडीयू, ३० खाटांची असिस्टेड लिव्हिंग सुविधा, बहुविशेषज्ञ ओपीडी, औषधालय, मेडिकल स्टोअर, कॅफेटेरिया तसेच इतर आधुनिक आरोग्य सुविधा उपलब्ध करून दिल्या जाणार आहेत. सुमारे ४० कोटी रुपयांच्या या प्रकल्पाच्या पहिल्या टप्प्यात सुमारे ६ कोटी रुपयांची कामे हाती घेतली जाणार असून, हा प्रकल्प मराठवाड्यातील आरोग्यसेवेसाठी महत्त्वपूर्ण ठरेल, असा विश्वास त्यांनी व्यक्त केला. कार्यक्रमाचे सूत्रसंचालन लायन डॉ. हिमांशू गुप्ता, लायन पूजा भाले आणि लायन नंदकिशोर मालपानी यांनी केले. सचिव लायन डॉ. विक्रांत भाले यांनी आभार मानले. कार्यक्रमाच्या यशस्वी आयोजनासाठी लायन ऋतु चावला, लायन रचना मुंदडा, लायन स्मिता मालपानी, लायन वंदना बगरिया, लायन अश्मिता जैस्वाल, लायन भगतसिंग दरक यांच्यासह सर्व सदस्यांनी विशेष परिश्रम घेतले.