अकोला जिल्ह्यातील काँग्रेसचे ज्येष्ठ नेते आणि महाराष्ट्र प्रदेश काँग्रेसचे उपाध्यक्ष हिदायत पटेल यांच्यावर आज अकोट तालुक्यातील माहोळ गावात अज्ञातांकडून प्राणघातक हल्ला करण्यात आला. या हल्ल्यात पटेल गंभीर जखमी झाले असून त्यांची प्रकृती अत्यंत चिंताजनक
.
मिळालेल्या माहितीनुसार, हिदायत पटेल हे आज माहोळ गावात असताना काही हल्लेखोरांनी त्यांना घेरले आणि धारदार शस्त्रांनी त्यांच्यावर सपासप वार केले. या हल्ल्यात पटेल यांच्या पोटावर आणि मानेवर खोलवर जखमा झाल्या आहेत. भरदिवसा झालेल्या या हल्ल्यामुळे परिसरात मोठी पळापळ झाली. रक्ताच्या थारोळ्यात पडलेल्या पटेल यांना तातडीने अकोट येथील रुग्णालयात नेण्यात आले. मात्र, अतिरक्तस्राव आणि जखमांचे गांभीर्य लक्षात घेता, प्राथमिक उपचार करून त्यांना तातडीने अकोला येथील मोठ्या रुग्णालयात हलवण्यात आले आहे.
अकोल्यात पोलिसांचा कडक बंदोबस्त
हिदायत पटेल यांच्यावर हल्ला झाल्याचे वृत्त वाऱ्यासारखे पसरताच अकोला आणि अकोटमधील काँग्रेस कार्यकर्त्यांनी मोठ्या संख्येने रुग्णालयाबाहेर गर्दी केली. कार्यकर्त्यांमधील संताप पाहता आणि कायदा-सुव्यवस्थेचा प्रश्न निर्माण होऊ नये म्हणून पोलिसांनी अकोला शहरासह माहोळ गावात कडक पोलीस बंदोबस्त तैनात केला आहे.
आरोपींचा शोध घेण्यासाठी पोलिसांची विविध पथके रवाना करण्यात आली आहेत. हा हल्ला कोणी आणि का केला, याचा तपास युद्धपातळीवर सुरू आहे. लवकरच गुन्हेगारांना अटक केली जाईल,” असे पोलीस प्रशासनाकडून सांगण्यात आले आहे.
हल्ल्यामागे राजकीय वैमनस्याची किनार?
राज्यात सध्या महानगरपालिका निवडणुकांचे पडघम वाजत असतानाच हा हल्ला झाल्याने राजकीय वर्तुळात उलटसुलट चर्चांना उधाण आले आहे. नुकत्याच झालेल्या नगरपालिका निवडणुकीत अकोट नगरपालिकेच्या काँग्रेस नगराध्यक्ष उमेदवार अलका बोडके यांनी हिदायत पटेल यांच्यावर पक्षाविरोधी भूमिका घेतल्याचा जाहीर आरोप केला होता. या सर्व पार्श्वभूमीवर, हा हल्ला राजकीय वादातूनच झाला असावा, असा कयास पोलिसांनी वर्तवला आहे.
कोण आहेत हिदायत पटेल?
हिदायत पटेल हे महाराष्ट्र प्रदेश काँग्रेसचे उपाध्यक्ष आणि अकोला जिल्ह्यातील ज्येष्ठ नेते. त्यांनी २०१४ आणि २०१९ च्या लोकसभा निवडणुकीत काँग्रेसचे उमेदवार म्हणून निवडणूक लढवली. अकोला जिल्ह्यातील काँग्रेसचा एक आक्रमक आणि महत्त्वाचा चेहरा म्हणून हिदायत पटेल यांची ओळख आहे.
