रस्ते महामार्गावरील अपघातांचे सत्र थांबण्याचे नाव घेत नसून, बुलढाणा-छत्रपती संभाजीनगर महामार्गावरील धाड गावाजवळ एसटी बस आणि दुचाकीच्या भीषण अपघातात तीन तरुणांचा दुर्दैवी मृत्यू झाला आहे. बस आणि दुचाकीची समोरासमोर जोरदार धडक झाल्याने हा भीषण अपघात घडल
.
मिळालेल्या माहितीनुसार, छत्रपती संभाजीनगरकडून बुलढाण्याकडे जाणाऱ्या एका शिवशाही बसला धाड गावाजवळ भरधाव दुचाकीने दिलेल्या जोरदार धडकेत भीषण अपघात झाला. या अपघातात दुचाकीवरील तिन्ही तरुणांचा जागीच मृत्यू झाला आहे. धडक इतकी भीषण होती की, स्थानिकांनी तातडीने मदतकार्य सुरू करून रुग्णवाहिकेला पाचारण केले, तरीही या तरुणांचे प्राण वाचू शकले नाहीत. या घटनेनंतर परिसरात एकच खळबळ उडाली असून नागरिकांनी अपघातस्थळी मोठी गर्दी केली होती.
या अपघातात मृत्युमुखी पडलेले तिन्ही युवक बुलढाणा जिल्ह्यातील ढाल सावंगी येथील रहिवासी असून कैलास दांडगे, रवी चंदनशिव आणि अंकुश पाडळे अशी त्यांची नावे आहेत. विशेष म्हणजे हे तिन्ही तरुण 20 वर्षांखालील वयाचे होते, ज्यामुळे ढाल सावंगी गावावर शोककळा पसरली आहे. या भीषण अपघातामुळे महामार्गावरील वाहतूक काही काळासाठी पूर्णपणे ठप्प झाली होती, मात्र पोलिसांनी घटनास्थळी पोहोचून परिस्थितीवर नियंत्रण मिळवले आणि वाहतूक पूर्ववत केली.
टॅक्सी उलटल्याने 10 प्रवासी जखमी
बुलढाणा जिल्ह्यातील नांदुरा-बुऱ्हाणपूर मार्गावर एका भरधाव वडाप टॅक्सीचा भीषण अपघात झाला असून, टॅक्सी रस्त्यालगतच्या खड्ड्यात उलटल्याने त्यातील 10 प्रवासी गंभीर जखमी झाले आहेत. या अपघातातील सर्व जखमींना तातडीने उपचारासाठी खामगाव येथील शासकीय रुग्णालयात दाखल करण्यात आले आहे. या घटनेमुळे नांदुरा-बुऱ्हाणपूर मार्गावरील वाहतूक काही काळ पूर्णपणे ठप्प झाली असून, माहिती मिळताच पोलिसांनी घटनास्थळी धाव घेत मदतकार्य सुरू केले आहे.
